Aldadılaraq Həştərxana aparılan və burada yerli millətlərə mənsub şəxslər tərəfindən girov kimi saxlanılan həmyerlimiz Tərlan Mustayev Diasporla İş üzrə Dövlət Komitəsinin köməyi ilə azad edilib.
İki ay girovluqdan sonra Vətənə qayıdan T.Mustafayev başına gələn hadisələr barədə Modern.az-a danışıb. O, Rusiyaya meyvə-tərəvəz satışı ilə məşğul olmaq üçün yollandığını, orada aldadıldığını deyib:
“Yaxından tanımadığım şəxs işləmək adı ilə məni aldadaraq Rusiyanın Həştərxan vilayətinə göndərdi. Mən ora çatanda məlum oldu ki, sən demə, həmin şəxsin külli miqdarda borcu var. O, Həşrətxanda yerli millətin nümayəndələrindən borca pul alıb xərcləyib, ancaq borcu geri qaytarmayıb. Mən də həmin şəxs tərəfindən yollandığım üçün geri qayıtmağa qoymadılar. Düzdür, burada məni hansısa otağa bağlayıb, işgəncə vermədilər. Ancaq mən gedəcəyim təqdirdə onların borcunu qaytarmalı olan şəxsi tapa bilməyəcəklərini bildirdilər və geri dönməyimə icazə vermədilər”.
T.Mustafayev Diasporla İş üzrə Dövlət Komitəsinin səyləri nəticəsində Azərbaycana qayıda bildiyini sözlərinə əlavə edib:
“Diaspor Komitəsinə təşəkkür edirəm, onlarla əlaqə saxladıqdan sonra bizə dərhal köməklik göstərdilər. Mənimlə ciddi şəkildə maraqlandılar, Vətənə qayıtmağım üçün yardım etdilər. Diaspor nümayəndələri geri qayıtdıqdan sonra mənimlə görüşüb, vəziyyətimlə maraqlandılar. Komitə məni xilas etdi, onlara minnətdarlığımı bildirirəm”.
Qeyd edək ki, bir müddət öncə Azərbaycan vətəndaşı İsmayıl Mustafayev Diasporla İş üzrə Dövlət Komitəsinə müraciət edib. O, oğlu Tərlan Mustafayevin iki aydır Həştərxanın Privoljoskiy rayonunda təsərrüfat sahəsində qanunsuz saxlanılaraq qul kimi işlədildiyini söyləyib.
İ.Mustafayevin dediyinə görə, oğlu aldadılaraq iş adamları ilə görüşmək adı ilə Həştərxana göndərilib. Məlum olub ki, Tərlan Mustafayevi göndərən şəxsin Həştərxandakı iş adamlarına külli miqdarda borcu olub və Şimali Qafqaz xalqlarına mənsub olan şəxslər bu səbəbdən Tərlanı girov kimi saxlayıblar.
İ.Mustafayev oğlunun azadlığa buraxılması üçün Azərbaycanda və Rusiyada bir sıra qurumlara müraciət etsə də, nəticəsi olmayıb.
Atanın müraciətindən sonra Diasporla İş üzrə Dövlət Komitəsi Həştərxan Vilayəti Azərbaycanlılarının Milli-Mədəni Cəmiyyəti ilə əlaqə saxlayaraq məsələnin araşdırılması və müvafiq köməyin göstərilməsini xahiş edib. Təşkilat dərhal məsələyə reaksiya verərək Həştərxanda fəaliyyət göstərən Dağıstan nümayəndəliyinin üzvləri ilə birgə soydaşımızın saxlanıldığı yerə gedib və danışıqlardan sonra onu girovluqdan azad ediblər.
