“Məktəblərə dərsliklər çoxdan verilməli idi, amma biz bu gün də məktəblərdə dərsliklərin şagirdlərə paylanılmadığını görürük. Bu, çox ciddi problemdir”.
Bu fikirləri açıqlamasında Milli Məclisin deputatı Ceyhun Məmmədov deyib. Deputat qeyd edib ki, planlaşdırmanın əvvəlcədən aparılması vacib idi:
“Dərsliklər öncədən hazırlanmalı və uşaqlara paylanılmalı idi. Artıq bir aydır ki, yeni tədris illi başlayıb, amma bu gün də bizim balalarımız dərsliklərini ala bilməyiblər. Çox təəssüf ki, Azərbaycan dili dərsliyi də uşaqlara verilməyib. Bunun səbəbləri barədə isə konkret və dəqiq açıqlama verilmir. Burada görünən odur ki, nazirliyin fəaliyyətində təşkilatı məsələlərlə bağlı hansısa problemlər var. Elm və Təhsil Nazirliyi çox operativ şəkildə bu məsələyə müdaxilə edərək, dərsliklərlə bağlı məsələni həll etməlidir. Çalışılmalıdır ki, növbəti illərdə belə problem olmasın. Səbəb nə olur-olsun, istər maliyyə, istər təşkilati və s. belə hallar olmamalıdır. Biz bilirik ki, hər il sentyabrın 15-i dərslər başlayır. Əgər dərslər başlayırsa, biz buna hazır olmalı idik. Əvvəlcədən proqramlar, dərsliklər hazırlanmalı və hər bir məsələ həllini tapmalıdır ki, yekunda biz belə problemlərlə üzləşməyək. Vaxtında da bizim uşaqlarımız dərslikləri əldə edə bilsinlər”.
