“Kazakistan Paramount Engineering” (KPE) şirkətinin istehsal etdiyi “Alan” və “Arlan” zirehli maşınları həm Qazaxıstan Ordusu, həm də xüsusi xidmət orqanları tərəfindən istifadə olunur.
Alp.az xəbər verir ki, bunu KPE şirkətinin Baş direktoru Yerbol Səlimov POLİQON jurnalına müsahibəsində bildirib.
Şirkətin Baş direktoru Azərbaycanın Vətən Müharibəsində istifadə etdiyi və “SandCat” kimi tanınan “Alan”-ın zireh hissəsinin istehsalında müəyyən miqdarda yüngül kompozit materiallardan istifadə olunduğunu vurğulayıb: “Bu materialların zirehin bir hissəsi kimi istifadə olunması ona əlavə qorunma təmin edir və maşının nə çəkisi, nə də performans xüsusiyyətlərinə təsir göstərmir”.
Yerbol Səlimov qeyd edib ki, “Alan” bir neçə konfiqurasiyada kəşfiyyat, komanda-idarəetmə, müxtəlif növ silahlara malik xüsusi əməliyyat maşını kimi istehsal oluna bilər.
Şirkətin istehsal etdiyi “Arlan” (Azərbaycan Ordusunun silahlanmasındakı adı “Marauder”) zirehli döyüş maşını haqqında da danışan Yerbol Səlimov onun həm Azərbaycanın, həm də Qazaxıstanın əfsanəsinə çevrildiyini bildirib: “Ölkənizin qələbəsi ilə başa çatan Qarabağ müharibəsindən sonra təkcə Qazaxıstanda deyil, Azərbaycanda da əfsanəyə çevrilib. Azərbaycanda “Marauder” olaraq tanınan avtomobil, POLİQON jurnalının adlandırdığı kimi “Dəmir Mələk” oldu. Hücum və partlayışlara məruz qalmalarına baxmayaraq onların içərisində tək bir Azərbaycan əsgəri belə ölmədi”.
STANAG lv 3 A və 3 B kimi mina əleyhinə yüksək müdafiəyə sahib olan “Arlan” təkərlərinin və dibinin altında 8 kq TNT, eləcə də 5 metr məsafə 50 kq TNT partlayışlarına qarşı davamlıdır.
Maşın 7,62 mm çaplı zireh deşən patron, “Dragunov” snayper tüfəngi və NATO standartı 12,7 mm-lik istənilən atıcı silahın atəşinə tab gətirə bilir.
