Daşkəsən Şəhidlər xiyabanında Vətən müharibəsi şəhidləri gizir Abdullayev Şəhriyar Kamil oğlunun və gizir İsmayılov Novruz Nürəddin oğlunun xatirələri anılıb.
Anım mərasimində Daşkəsən Rayon İcra Hakimiyyətinin başçısı Əhəd Abıyev, Kəlbəcər Rayon İcra Hakimiyyətinin başçısı Azər Qocayev, Daşkəsən və Kəlbəcər rayonlarının hüquq-mühafizə orqanlarının rəhbərləri, ictimaiyyət nümayəndələri, şəhidlərin ailə üzvləri, şəhid anaları və qazilər iştirak ediblər.
Rayon icra hakimiyyətindən verilən məlumata görə, əvvəlcə şəhidlərin məzarları ziyarət olunaraq önünə gül dəstələri düzülüb, ruhlarına dualar oxunub.
Çıxış edən Daşkəsən Rayon İcra Hakimiyyətinin başçısı Əhəd Abıyev şəhidlərin ailələrinə rayon ictimaiyyəti adından bir daha başsağlığı verib, Müzəffər Ali Baş Komandan İlham Əliyevin rəhbərliyi ilə Vətən müharibəsində qazanılan Qələbənin tarixi əhəmiyyətindən danışıb, ölkə rəhbərinin və Birinci vitse-prezident Mehriban Əliyevanın şəhid ailələrinin, qazilərin və müharibə iştirakçılarının qayğılarını daim diqqət mərkəzində saxladıqlarını vurğulayıb.
Kəlbəcər Rayon İcra Hakimiyyətinin başçısı Azər Qocayev isə qeyd edib ki, torpaqlarımızın azadlığı uğrunda canlarından keçərək müqəddəs şəhidlik zirvəsinə ucalan Vətən övladlarının xatirəsi daim əziz tutulduğu kimi, onların ailə üzvləri də hər zaman dövlət qayğısı ilə əhatə olunacaqlar.
Şəhidlərin valideynləri ailələrinə göstərilən diqqət və qayğıdan razı qaldıqlarını vurğulayıb, buna görə Prezident İlham Əliyevə və Birinci vitse-prezident Mehriban Əliyevaya minnətdarlıqlarını bildiriblər.
Sonra Daşkəsən Şəhidlər xiyabanında ehsan süfrəsi açılıb.
