Daşkəsən rayonunda təbii qazdan istifadə zamanı təhlükəsizlik qaydalarına riayət edilməsi və meşələrin yanğından mühafizəsi mövzusunda seminar-müşavirə keçirilib.
09 avqust 2022-ci il tarixində Daşkəsən Rayon İcra Hakimiyyətində “təbii qazdan istifadə zamanı təhlükəsizlik qaydalarına riayət edilməsi və meşələrin yanğından mühafizəsi” mövzusunda seminar-müşavirə keçirilib.
Tədbirdə Rayon İcra Hakimiyyətinin məsul işçiləri, rayon Polis şöbəsinin, rayonun qaz istismar sahəsinin, dövlət yanğından mühafizə hissəsinin, yanğın nəzarəti şöbəsinin, meşə mühafizəsi və bərpası müəssisəsinin rəhbər və məsul şəxsləri, RİHB-nin inzibati ərazi dairələri üzrə nümayəndələri, bələdiyyə sədrləri və Kommunal Müəssisələri Kombinatının evlər üzrə texnikləri iştirak edib.
Daşkəsən Rayon İcra Hakimiyyəti başçısının müavini Vüqar Məmmədov iclası giriş sözü ilə açaraq tədbirin “Yerli icra hakimiyyətləri haqqında Əsasnamə”nin və “Yanğın təhlükəsizliyi haqqında” Azərbaycan Respublikası Qanununun müvafiq maddələrinin tələblərinə əsasən sakinlərə yanğın təhlükəsizliyi qaydalarının izah olunması, ərazidə baş verə biləcək yanğınların qarşısının alınması və yanğın təhlükəsizliyi sahəsində maarifləndirmə işlərinin aparılması məqsədilə keçirildiyini vurğulamışdır.
Vüqar Məmmədov çıxışında avqustun 3-də Xırdalan şəhərində beşmərtəbəli yaşayış binasında qaz sızmasından baş vermiş partlayış və onun nəticələri barədə tədbir iştirakçılarını məlumatlandırmışdır. 1990-cı illərdə Daşkəsən şəhərində də yaşayış binasında oxşar hadisə baş verdiyini qeyd etmişdir.
Bu cür bədbəxt hadisələrin baş verməməsi üçün mütləq yanğın təhlükəsizliyi qaydalarına əməl edilməsi və bu sahədə insanların maarifləndirilməsinin vacibliyini vurğulayaraq bildirmişdir ki, 14 noyabr 2018-ci il tarixdə rayonun Quşçu kəndində baş vermiş dəhşətli yanğın zamanı ümumi sahəsi 150 m2 olan fərdi yaşayış evi tamamilə yanmış və 3-ü azyaşlı olmaqla, 5 nəfər faciəli şəkildə ölmüşdür.
2004-cü ilin mart ayında rayon ərazisində eyni vaxtda bir neçə yaşayış məntəqəsində böyük miqyasda yanğın hadisəsi baş verməsi və çoxsaylı fərdi yaşayış evlərinin yanması barədə məlumat vermişdir.
Bildirmişdir ki, Azərbaycan Respublikası Nazirlər Kabinetinin 12.05.2011-ci il tarixli 80 №-li qərarı ilə təsdiq edilmiş “Təbii qazdan istifadə Qaydaları”na ciddi əməl edilməsi, qazdan düzgün istifadə ilə bağlı əhalinin məlumatlandırılması, məişət qaz qurğularının təhlükəsiz və etibarlı istismar edilməsi məqsədilə həmin qurğulara, tüstü bacalarına və qazpaylayıcı şəbəkəyə texniki baxış keçirilməsi təmin edilməlidir.
Təmir bərpa və digər texniki məsələlərlə əlaqədar qaz təchizatının dayandırılmasına zərurət yarandığı təqdirdə bu barədə istehlakçılara kütləvi informasiya və mənzil istismar sahələri vasitəsi ilə məlumat verilməlidir. İstehlakçılar isə qaz qurğularını “Qaz təchizatı haqqında” Azərbaycan Respublikası Qanuna müvafiq olaraq istismarına və işçi vəziyyətdə saxlanılmasına görə məsuliyyət daşıyırlar.
Yaşayış evlərində, ictimai binalarda, təhsil, səhiyyə, digər idarə və müəssisələrdə təbii qazdan istifadə zamanı Təhlükəsizlik Qaydalarına ciddi riayət edilməlidir.
Daşkəsən Rayon İcra Hakimiyyəti başçısının müavini Vüqar Məmmədov çıxışında qeyd etmişdir ki, iş yerlərində əməyin mühafizəsi və texniki təhlükəsizliyinə nəzarət edilməli, eyni zamanda hər bir kəs öz şəxsi əmlakını bədbəxt hadisələrdən qorumaq üçün sığortalamalıdır.
Müşavirədə həmçinin meşələrin ümumi vəziyyəti, yanğınların baş vermə səbəbləri, meşə yanğınlarından yaranan itkilər, habelə meşələrdə yanğın təhlükəsizliyinin təmin olunması barədə aidiyyəti qurumların əməkdaşları ilə qarşılıqlı müzakirələr və fikir mübadiləsi aparılıb.
