Azərbaycana cəbhədə uduzan Ermənistan öz məkrli siyasətini yeni müstəvilərə keçirməkdə davam edir. Yadınızdadırsa, Azərbaycan öz torpaqlarını işğaldan azad edən zaman Ermənistan rəhbərliyi telefondan asılı qalmışdı. Az qala Afrikadakı qəbilələrdən də dəstək istəyən Nikol Paşinyanın bu cəhdləri də puç olandan sonra ermənilər ümidlərini diplomatiya və diaspora bağlayırlar.
2020-ci ilin noyabrın 10-da imzalanmış üçtərəfli sazişdən 2 il keçsə də, Ermənistan öhdəliklərini yerinə yetirmək istəmir. Hər vəchlə yenə öz himayədarlarına güvənərək, Zəngəzur dəhlizini açmaq istəmir.
Şübhəsiz ki, Azərbaycanın iradəsi ilə bu dəhliz açılacaq. Ermənistan Azərbaycanın ərazi bütövlüyünü tanıyacaq.
Sadəcə, cəbhədə uğursuzluqdan sonra yeni fazalar axtarışında olan Ermənistan yenə də vaxt uzatmaq istəyir. Uzun zamandır ki, Ermənistan diplomatiyada pozucu addımlarını davam etdirir. Arada Azərbaycanın Kəlbəcər, Laçın, Tovuz, və s. bölgələrində atəşkəsi pozmaqla bu siyasətə həm də silahlı dəstək verir. Bu istiqamətdə heç bir nəticə əldə edə bilməyən Ermənistan indi də diaspor sahəsində revanşist addımlar atır. Bu addım yalnız ayrı-ayrı ölkələrdə erməni diasporunun Azərbaycana qarşı əsasız iddiaları ilə məhdudlaşmır.
Bilərəkdən, ya bilməyərəkdən bəzən həm xaricdəki soydaşlarımız, həm də Azərbaycanda fəaliyyət göstərən bəzi qeyri-hökumət təşkilatı rəhbərləri bu məkrli siyasətə dolayısı ilə dəstək vermiş olurlar.
Məlumdur ki, 44 günlük Vətən savaşında xaricdə yaşayan azərbaycanlılar bir nəfər kimi ayaqda oldular. Əlbəttə ki, burada mövzu Qarabağ olduğundan soydaşlarımızdan yanlış nə isə gözlənilmirdi. Mövzu Vətən oldusa, xaricdəki hər bir azərbaycanlı həyatından keçməyə hazır olur. Bunu ayrı-ayrı ölkələrdəki təcrübələr də göstərir. Heç şübhəsiz ki, bu işin koordinatoru Diasporla İş üzrə Dövlət Komitəsidir. Ancaq təəssüflə qeyd edilməlidir ki, Azərbaycan dövlətinin diaspor siyasətinin uğurları erməni lobbisi ilə yanaşı, bəzi “azərbaycanlılar” tərəfindən də həzm edilmir. Dünya azərbaycanlılarının “Dəmir Yumruq” ətrafında birləşdiyi vaxt özümüzdən olan nadanlar erməni diasporuna dəstək olmağı üstün tuturlar.
Dünyada nə qədər ölkə varsa, həmin ölkələrdə azərbaycanlılar yaşayır. Təbii ki, ölkələr fərqliliyində, düşüncələr fərqliliyində, maraqlar fərqliliyində diasporla işləmək asan iş deyil.
Cəbhə məğlubiyyəti Ermənistanı diplomatiya və diaspor mübarizəsində qalib edə bilməyəcək. Əksinə, artıq Ermənistan diplomatiyada da, diaspor sahəsində də məhv olmuş durumdadır.
Bütün bunlara rəğmən, bəs, erməni lobbisinin az qala emissarları olan “soydaşlarımız” heçmi düşünmürlər ki, nə edirlər?
Heçmi anlamırlar ki, əslində bu hərəkətləri ilə Azərbaycan dövlətinə qarşı çıxırlar?
Bununla bağlı Modern.az-a danışan Milli Məclisin deputatı Məlahət İbrahimqızının sözlərinə görə, Azərbaycanın qazandığı Zəfər dünya erməniliyinə, təcavüzkarlara ağır zərbə vurub:
“Nəticədə əbədi məğlubiyyətə düçar olublar. Bu məğlubiyyəti qəbul etmək ermənilər üçün çox çətindir. Azərbaycana qarşı əsassız torpaq iddiası , düşmənçilik bir neçə ilin düşmənçiliyi deyil. Bir neçə əsr tarixə malik olan bu fitnəkarlıq ermənilərin artıq xislətinə hopub.
Nikol Paşinyan nə Ermənistanın içərisində, də dünya erməniliyi qarşısında söz sahibidir. Erməni diasporunun içində müxtəlif qarşıdurmalar var. Bir qrup mövcud reallığı qəbul etməyi üstün tutsa da, digər bir qrup qətiyyən məğlubiyyətlə barışmır. İkinci qrup Azərbaycana qarşı müxtəlif təxribatların müəllifi, yeni planların təşəbbüskarıdırlar.
Serj Sarkisyan, Robert Koçaryan və digərləri böyük hərbi cinayətlər törədiblər. Onların vəhşilikləri, soyqırımı və etnik təmizləmə siyasətinə görə, nə zamansa beynəlxalq tribunalın qarşısına çıxarılacaqlar.
Məğlubiyyəti qəbul etməyən qüvvələr Azərbaycan və Ermənistan arasında sülh müqaviləsinin imzalanmasını gecikdirmək, bölgədə vəziyyəti gərginləşdirmək, yeni münaqişələrə ortaya çıxarmağa çalışırlar. Elə bir neçə gün bundan öncə Brüsseldə Avropa İttifaqının rəhbərinin təşəbbüs ilə Azərbaycan və Ermənistan prezidentlərinin görüşü oldu. Bundan sonrakı bəyanatlarda da, ölkə başçımızın müsahibələrindən də açıq dedi ki, sülh təklif edilən 5 maddəni Paşinyan qəbul edib. Bu xəbər erməni diasporu arasında səs-küyə səbəb oldu. Görünür ki, Paşinyanın üzərində də ciddi basqı var və ermənilər özləri biri-birlərinə qarşı fəaliyyətdədirlər. Ermənistanda hələ də qeyri-rəsmi terrorçu, təxribatçı qüvvələr var. Ordunun belə daxilində müxtəlif qruplaşmalar var”.
Məlahət İbrahimqızının sözlərinə görə Azərbaycanın içərisində isə müəyyən qeyri-hökumət təşkilatları var ki, işğalçının dili ilə danışır, istəyərək, ya da istəməyərək onlara dəstək verirlər:
““V kolon”un üzvlərindən olan antimilli qüvvələrdən biri – Əli Kərimli videomüsahibə verirdi. Əli Kərimli deyir ki, niyə Azərbaycan Laçının gələcək inkişaf konsepsiyasında deyil, Zəngəzurdan danışır. Eşitdiklərimə inana bilmədim. Azərbaycan xalqının qanına susamış bu gün də düşmənçilik münasibəti bəsləyən erməni faşistlərinin dili ilə danışanlara qarşı mübarizə aparmalıyıq. Bu ünsürlərlə mübarizə tək dövlət qurumlarının işi deyil, xalq mübarizəyə qoşulmalıdır.
Prezidentimizin Zəngəzur siyasəti, dəhlizlə bağlı uzaqgörən düşüncələri siyasi, iqtisadi tarixi var. Hesab edirəm ki, biz daxilimizdə olan antimilli qüvvələrlə mübarizəmizi gücləndirməliyik. Erməni erməniliyində qalır, dəyişməyəcək. Biz isə təxribatçı qüvvələrə imkan verməməliyik. İçimizdə hansısa antimilli qüvvənin düşüncəsinə qarşı ciddi olmalıyıq. Daha çox Azərbaycandan Vətən xaini kimi qaçmış şəxslər var ki, başqa ölkələrdə qorxaq kimi gizləniblər, hansısa vasitələrlə ölkəmizə qarşı şər-böhtan atmaqla məşğuldurlar. Ermənilərlə iş birliyində olanlar ermənilərin ruhu, düşüncəsi ilə danışacaqlar. Onlar ən azı torpaqlarımızın işğaldan azad olunması uğrunda canından keçmiş şəhidlərimizin qarşısında xəcalət çəksinlər. İçimizdəki xainləri nə Allah, nə də xalq bağışlayacaq. Cəmiyyət də bunları qəbul etməyəcək. Gec-tez onları sıradan çıxaracaqlar”.
