“Ərəb dünyası ölkələri ilə sıx əməkdaşlıq ölkəmizin xarici siyasətinin aparıcı poritetlərindən biridir”, – Alp.az xəbər verir ki, bunu Milli Məclisin deputatı Cavanşir Feyziyev CBC televiziyasına müsahibəsində deyib.
Azərbaycanın İslam dünyası ölkələri ilə əlaqələrinin xarakteri ilə bağlı sualı cavablandıran deputat belə izah edib ki, “…Hələ 1991-ci ildə, müstəqilliyini bərpa etdikdən dərhal sonra Azərbaycan bütün dünyaya qarşılıqlı əməkdaşlığa açıq olduğunu bəyan edib. 1993-cü ildə Heydər Əliyevin hakimiyyətə gəlişi ilə ilk növbədə, təbii ki, neft sektorunda nəhəng iqtisadi əməkdaşlıq layihələri hazırlanmağa başlandı. Ümummilli liderin uzaqgörən neft strategiyası sayəsində dünyanın ən iri şirkətləri ölkəmizin iqtisadiyyatına sərmayə qoymağa cəlb olundu. Bu əməkdaşlığın əhatəsi xeyli genişlənib və demək olar ki, bütün qitələri əhatə edib”.
Gələcəkdə Azərbaycanın xarici iqtisadi əlaqələrinin inkişafını səciyyələndirən Cavanşir Feyziyev qeyd edib ki, “Prezident İlham Əliyevin rəhbərliyi dövründə Azərbaycan İslam dünyası ilə iqtisadi və siyasi əlaqələri fəal şəkildə genişləndirməyə başlayıb. Son on il ərzində Azərbaycan bütün İslam dünyasının mədəni, humanitar və siyasi həyatında fəal rolu sayəsində bir çox ölkələrlə, o cümlədən ərəb ölkələri ilə tərəfdaşlıq və dostluq münasibətlərinə nail olub. Etibarlı tərəfdaş nüfuzunun artması ilə yanaşı, mədəni-mənəvi yaxınlığına görə ərəb ölkələri Azərbaycanın bütün İslam dünyasının dövlətləri ilə əməkdaşlığında mühüm rol oynamış və oynamaqda davam edir. Təsadüfi deyil ki, 2020-ci il Vətən Müharibəsi zamanı demək olar ki, bütün ərəb ölkələri Azərbaycanın ədalətli mövqeyini dəstəkləyiblər. Hazırda bir sıra ərəb ölkələrinin şirkətləri işğaldan azad edilmiş Qarabağ və Şərqi Zəngəzur ərazilərinin bərpasında uğurla iştirak edirlər. Beləliklə, İslam dünyası ilə əlaqələrimizin məzmununu ümumiləşdirərək birmənalı şəkildə qeyd edə bilərik ki, İslam dünyası ölkələri, xüsusən də ərəb dünyası ölkələri ilə əməkdaşlıq ölkəmizin xarici siyasətinin ciddi, aparıcı tərəfdaşlarından biridir. Bu siyasət kifayət qədər uğurla həyata keçirilir. Azərbaycan Prezidentinin bu yaxınlarda Əlcəzairə səfəri də bu cür qarşılıqlı faydalı əməkdaşlığın daha bir təsdiqidir”.
Deputat Azərbaycanın ərəb dünyası ölkələri ilə əməkdaşlığının gələcək perspektivlərinə toxunaraq deyib: “Bu arada qeyd etməliyəm ki, ərəb dünyası ilə əməkdaşlığımızın bu istiqamətdə daha geniş vüsət alması və yeni təşəbbüslərlə zənginləşməsi üçün böyük potensialı var. Əminəm ki, hökumətimiz Prezident İlham Əliyevin həyata keçirdiyi rasional və praqmatik siyasət nəticəsində yaranan bütün yeni imkanlardan yararlanacaq”.
