“Sizə söz verirəm. Biz onlara hər gün hücum edəcəyik. Hər gün onları məhv edəcəyik. Biz bu şeytanları əsir götürməyəcəyik, yandıracağıq…”
Alp.az xəbər verir ki, bunu Çeçenistan rəhbəri, bu yaxınlarda ad günü münasibətilə Putinin general-polkovnik(!) rütbəsi hədiyyə etdiyi Ramzan Kadırov yeni videomüraciətində bildirib.
Kadırovun belə isterik reaksiyasına Çeçenistandan Ukraynaya göndərdiyi “kadırovçular”ın böyük bir qrupunun Xersonda məhv edilməsilə əlaqələndirilir. Belə ki, ötən gün Xerson vilayətində Kadırovun 100-dən artıq döyüşçüsünün yerləşdiyi məktəb binasına raket zərbəsi endirildiyi və binadakıların böyük hissəsinin məhv edildiyi bildirilir.
Çeçenistan başçısı müraciətində Ukraynadakı işğalçılıq müharibəsini cihad kimi qələmə verib. O, xüsusilə də qafqazlıları bu savaşa qoşulmağa çağırıb və Ukrayna torpaqlarının işğalının davam etdirilməli olduğunu bildirib: “Heç yerdə dayanmayacağıq. Bizim ərazimiz Zaporojye, Xerson deyil. Bizim ərazimiz Odessa, Kiyev, Xarkovdur… Bütövlükdə Ukrayna ərazisi Rusiyanındır. Artıq qərara gəlmişik ki, müdafiə olunmayacağıq, hücum edəcəyik.
Bir daha qafqazlılara müraciət edirəm. Yaradan bizə bu şeytanlarla və onların ideologiyası ilə savaşmaq üçün imkan verib… Biz əsl möminlərik(?). Bu gün özünə hörmət edən mömin adam evdə oturmaz. O, özü avtomat və ona lazım olan hər şeyi tapıb, satanizmlə döyüşməyə gedər. Sizə bir daha çağırış edirəm. Bu, bizim iştirak etməli olduğumuz böyük cihaddır. Nə fərqi var, onları kim idarə edir, Amerika, yoxsa Avropa”.
“AzPolitika.info”