Qardaş Türkiyə Cümhuriyyətinin 99-cu ildönümü münasibətilə Heydər Əliyev Mərkəzində rəsmi qəbul təşkil olunub.
Alp.az xəbər verir ki, Türkiyənin Azərbaycandakı fövqəladə və səlahiyyətli səfirliyi tərəfindən təşkil edilən tədbirdə Azərbaycan parlamentinin sədri Sahibə Qafarova, Milli Məclisin deputatları, xarici ölkə səfirləri, QHT və KİV nümayəndələri, partiya sədrləri iştirak edib. Türkiyə və Azərbaycan Respublikasının dövlət himnlərinin səsləndirilməsi ilə başlayan tədbirdə əvvəlcə Türkiyənin dövlət başçısı Rəcəb Tayyib Ərdoğanın 29 oktyabr Cümhuriyyət Günü ilə bağlı təbrik mesajı oxunub. Daha sonra qardaş ölkənin Azərbaycandakı fövqəladə və səlahiyyətli səfiri Cahit Bağıçı çıxış edib. Çıxışında Türkiyə-Azərbaycan dostluq və qardaşlığından danışan səfir tarixin bütün dövrlərində iki ölkənin bir-birinin yanında olduğunu söyləyib. Diplomat qeyd edib ki, 44 günlük Vətən müharibəsində də Türkiyə qardaş Azərbaycanın yanında yer aldı və ona mənəvi dəstək verdi. Cahit Bağçı bu gün də Türkiyənin Qarabağın bərpası prosesində Azərbaycanın yanında olduğunu söyləyib: “Türkiyə haqlı davasında olduğu kimi torpaqlarını işğaldan azad edəndən sonra da Qarabağın bərpa və quruculuğunda da Azərbaycanın yanındadır”.
Türkiyənin bütün imkanları ilə hər sahədə ən öndə olan ölkə olduğunu deyən səfir onu da diqqətə çatdırıb ki, Türkiyə və Azərbaycan Avropaya və Asiyaya açılan ilk körpüdür: “Beynəlxalq aləmdə tayı olmayan qardaşlığı isə sarsılmazdır. Azərbaycanın gələcəyi gələcəyimiz, sevinci sevincimiz, kədəri kədərimizdir”.
Səfir bildirib ki, bu sülh və sabitlikdən sadəcə bölgə ölkələri deyil, bütün dünya qazanclı çıxacaq: “Sabitlik və təhlükəsizliyin bölgəmiz, ölkəmiz və qonşularımız üçün çox əhəmiyyətli olduğuna inanırıq”. O, bildirib ki, artıq beynəlxalq qurumların təmin edə bilmədiyi ədalət və təhlükəsizlik təmin edilib, Qafqazda qanayan bir yara qapanıb, bölgədə davamlı sülh üçün fürsət yaranıb”.
Sonra çıxış edən Milli Məclisin deputatı Sahibə Qafarova bayram münasibətilə qardaş Türk xalqını təbrik edib. Milli Məclis sədri Azərbaycan və Türkiyənin dünyada bənzəri olmayan dostluq və qardaşlığından da söz açıb: “Türkiyənin xarici siyasəti bu gün dünya miqyasında böyük ehtiyac duyulan haqq-ədalət və dürüstlük meyarları üzərində qurulub”.
Spiker bildirib ki, qardaş ölkənin qarşıya çıxan beynəlxalq problemlər barəsində nümayiş etdirdiyi obyektiv mövqe dünyanın yaşadığı indiki təhlükəli dövrdə birmənalı olaraq sabitləşdirici rol oynayır”. Şuşa Bəyannaməsinin əhəmiyyətindən danışan Milli Məclisin sədri qardaş Türkiyənin Qarabağda və Şərqi Zəngəzurda həyata keçirilən bərpa-quruculuq işlərində və bütün digər məsələlərdə də Azərbaycanın yanında olduğunu qeyd edib.
