“Azərbaycan Ordusu Qarabağda erməni separatçılarına qarşı “Halqa əməliyyatı”nı həyata keçirməyə tam hazırdır”.
Alp.az-ın xəbərinə görə, bu fikirləri Demokrat.az-a açıqlamasında Xəzər Müdafiə Tədqiqatları Mərkəzinin rəhbəri, tanınmış hərbi şərhçi Ramil Məmmədli bildirib.
Ramil Məmmədli deyib ki, həm Ermənistanın, həm də erməni separatçılarının son 3 ildəki mövqeyi və fəaliyyəti Azərbaycanı bölgədə daha sərt addımlar atmağa vadar edir.
Onun sözlərinə görə, nə Ermənistan, nə Qarabağdakı separatçılar, nə də vasitəçilik missiyasını öz üzərinə götürən Rusiya, həmçinin Avropa İttifaqı Azərbaycanın Xankəndi və ətraf rayonlarında yerləşən erməni hərbi birləşmələrinin ərazidən çıxarılması prosesini həyata keçirməyib:
“Əsas gərginlik yaradan məqam da məhz bu amillərdir. Açıq şəkildə qeyd etmək lazımdır ki, Ermənistan Müdafiə Nazirliyinin Qarabağda dislokasiya olunmuş Ümumqoşun Ordusu (Əlahiddə) və separatçı silahlı birləşmələr 2020-2023-cü illər ərzində sürətlə silahllandırılıb. Həmçinin, həmin hərbi birləşmələr Azərbaycan Ordusu ilə təmas xətti qurmağa çalışırlar, o cümlədən, yeni mühəndis-istehkam xəttləri formalaşdırılır-buna cəhdlərin syaı gün-gündən artır. Qeyd olunan bütün bu cür məqamlar Ermənistanın Azərbaycana qarşı Qarabağda yeni hərbi kampaniya başlatmaq niyyətlərindən xəbər verir.
Düşünürəm ki, Azərbaycan Ordusunun da bölgədəki hazırlıq planında bu kimi təhlükələrin aradan qaldırılması öz əksini tapıb. Ordumuzun son illərdə aldığı silah-texnika arsenalının əsas hissəsi də hücum xarakterlidir.
Həmçinin, müasir texnologiyalar əsasında yaradılan hərbi məhsullardır. Belə demək mümkündürsə, Azərbaycan Ordusu daha sürətli hücum əməliyyatı ilə erməni hərbi birləşmələrinin sıradan çıxarılmasını planlaşdırır. Bu döyüş planının “Halqa əməliyyatı” taktikasında həyata keçirilməsi daha real görünür. Hesab edirəm ki, Ermənistan yalnız bu cür sülhə məcbur edilə bilər, Qarabağdakı erməni silahlı birləşmələri ya məhv, ya da tərkisilah olunmalıdır”.
