Son günlər Xocalı rayonunun Fərrux kəndi ətrafında gedən gərginlik barədə oxuculara geniş məlumat verməyə ehtiyac yoxdur.
Hər kəs bilir ki, artıq nə zamandır, Xankəndidəki separatçı-quldur dəstələri – və yaxud da, özünü “yerli özünümüdafiə dəstəsi” adlandıran, birbaşa Ermənistan ordusunun “trans” diversantları bizim mövqelərimizə atəş açır, təxribat törətməyə çalışırlar.
“Trans” deyirəm, çünki, bu çevrilməni başqa cür tərif eləmək mümkün deyil – cinsini dəyişdirənlərlə əlaqəsi yoxdur. Ümid edirəm, liberal ruhlu oxucularımız inciməz.
Həm də çox ümid edirəm, bütün liberal ruhlu və ya “müharibəyə yox” deyən oxucularımız da razılaşar ki, o ərazilərdə xidmət edən hərbçilərimiz risk altındadır, bir neçə ay və ya il sonra Ağdama və Kolanı dərəsindəki kəndlərə köçən dinc sakinlərin həyatı da təhlükə altında olacaq.
Müharibədə bir tərəf olmur, deməli, sülh də birtərəfli alınmayacaq.
Bu müqəddəs vəzifəni “üzərinə götürən” Rusiya sülhməramlıları isə belə bir riskin olmamasına nəzarət etməli, cavabdeh olmalı idilər.
Amma gördüklərimiz əksini deyir. Bir hal deyil, iki hal deyil. Qarabağa sülhməramlılar gələndən bəri, dəfələrlə atəşkəsi pozmaq cəhdləri olunub. Ordumuza və Qarabağda abadlaşdırma-quruculuq işlərində iştirak edən mülki şəxslərə hücumlar edilir.
Bu cür məlumatlar “Google”-da boldur.
30 il yurd-yuvasından didərgin düşən insanların geri qayıdışı gözlənilir. Böyük Qayıdış olacaq… Bəs, bu qayıdışın təhlükəsizliyinə kim zəmanət verəcək? Birgə Monitorinq Mərkəzi – hansı ki, çayxanaya çevrilib? Yoxsa, quldur dəstələrinə hər cür şərait yaradıb, konyakla vaxt keçirən sülhməramlılar?
Azərbaycan ordusu bütün şərtləri düzgün dəyərləndirdi və öz mövqeyini ortaya qoydu. Artıq o ərazilər – Fərrux dağı da, Fərrux kəndi də bizim nəzarətimiz altındadır. Deməli, gələcəkdə yaxın kəndlərə köçəcək yüzlərlə ailənin də təhülkəsizliyi təmin olunur.
Rusiya Müdafiə Nazirliyinin dünənki “fake” məlumatı isə özləri üçün biabırçı nəticə verdi.
Bəli, Rusiya Azərbaycandan qat-qat güclü dövlət ola bilər. Amma beynəlxalq hüquq normaları da hələ bizim tərəfimizdədir.
Azərbaycan tərəfi çox mədəni şəkildə qarşı tərəfə vəziyyəti izah edib. Vladimir Putin də şəxsən Azərbaycanın ərazi bütövlüyünü tanıdığını bəyan edib… Hələ, birgə bəyannaməyə də imza atıb.
O zaman problem nədir?
Azərbaycan şir ürəyi yeyib – bu gün müxtəlif xarici bloqqerlər və siyasətçilər tərəfindən verilən açıqlamalardan bu fikir yaranır.
Lap yaxşı. Bəs beynəlxalq ictimaiyyət nə yeyib içir ki, nəticədə Azərbaycana xəbərdarlıq edir, qoşunları Fərrux kəndindən çıxarmağa çağırır?!
Bəlkə, ona görə ki, Avropadakı siyasətçilər “trans” diversantları transgenderlərlə səhv salırlar?!
Ukraynanın ərazi bütövlüyü toxunulmazdır, amma Azərbaycana fərqli yanaşmaq olar?
Ukraynadakı dinc insanların ölümü onları narahat edir, lakin Azərbaycanda Gəncə, Mingəçevir və Bərdədəki hərbi cinayətlərin təkrarlanması elə də qorxulu deyil?
Hə, strateji əhəmiyyəti anladıq. Fərrux kəndi, Fərrux dağı çox əhəmiyyətli mövqelər sayıla bilər. Lakin bu yerlərin iqtisadi əhəmiyyəti də var. Qarabağlı dostlardan eşitdiyimə görə, bu yerlərin altı əlvan metalla boldur. Daha əli qanımıza bulaşanlara qismət olmaz, ümid edirəm. Vətənə, millətə xeyirli olsun!
Rüfət Əhmədzadə
Alp.az
