O qısa zamanda öz səsi ilə bütün Avropaya səs saldı. 18 yaşlı bir gənc dünyada məşhur olan “Səs” layihəsinin bütün münsiflərini heyran qoymağı bacardı.
Alp.az xəbər verir ki, söhbət “Səs” layihəsinin Ukrayna versiyasının iştirakçısı, gənc müğənni Vaqif Nağıyevdən gedir. 3 yaşından mahnı oxuyan bu gənci hələ vaxtilə ulu öndər Heydər Əliyev kəşf etmişdi. Möhtəşəm səsə malik bu balaca oğlan Ulu öndərin dəstəyi və göstərişi ilə yüksək musiqi təhsili aldı. Yaşadığı Ukraynada bir gecədə məşhurlaşan bu gənc oğlan Avropanın məşhur müğənnilərinin də diqqətini cəlb etdi. Məşhur italyan aktyor və müğənni Adriano Celentano onunla duet oxumağı özünə borc bildi. “Bu səs sənin səsindir?”-deyə zarafat edən dünyaca məşhur müğənni heyranlığını gizlətmədi. Vaqif Nağıyev səsi ilə bərabər öz vətənpərvərliyi ilə də diqqət çəkir. Gənc və məşhur müğənni Azərbaycana sevgisini və sədaqətini sübut etməyə hazır olan bir çox vətənpərvər gəncləri ətrafına toplayaraq Ukraynada təşkilat yaradıb.
Xatırladaq ki, Vaqif Nağıyev dünya şöhrətli italiyalı həmkarı İnqridlə “Drops of Hope” (“Ümid yağışı“) müəllif mahnısını yazdırıb.
