Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası Prezidentinin xüsusi nümayəndəsi Emin Hüseynov Ağdam və Füzulidə ermənilər tərəfindən dağıdılan binaların bəzilərinin bərpa edilməyəcəyini, elə bu cür də saxlanılacağını bildirib. Emin Hüseynov qeyd edib ki, bu, “qara turizm”in inkişafı və gələcək nəsillərə erməni vəhşiliyini xatırlatmaq, milli yaddaşı qoruyub saxlamaq bxımından əhəmiyyətlidir.
Moderator.az-a açıqlama verən millət vəkili Arzu Nağıyev bu addımı yüksək qiymətləndirdiyini bildirib:
“Şübhəsiz, işğaldan azad edilən ərazilərimizdə erməni vandalları tərəfindən dağıdılan bəzi binaların elə bu cür də qorunub saxlanılması erməni faşizminin və onun anti-insani mahiyyətini ifşa etmək baxımından mühüm əhəmiyyətə malikdir.
Azərbaycan işğaldan azad edilən ərazilərdə cənnət yaratmağı hədəfə alıb və bu istiqamətdə böyük layihələr həyata keçirir. Yaxın gələcəkdə biz işğaldan azad edilmiş ərazilərimizin simasının tamamilə dəyişdiyinə, müasir kəndlərin, şəhərlərin meydana gəldiyinə şahid olacağıq. Lakin biz bütün bu işləri həyata keçirməklə yanaşı, erməni vəhşiliyinin bütün izlərini silməmək haqqında da düşünürük. İstəyirik ki, həm gələcək nəsillər, həm də ölkəmizə səfər edən turistlər bu yerləri gəzdikcə ermənilərin zamanında bu torpaqlarda necə böyük vəhşiliklər həyata keçirdiyini görsün. Erməni xislətinin, erməni xəstəliyinin nə qədər təhlükəli olduğunu dərk etsin. Bu baxımdan Ağdam və Füzulidə bəzi binaların dağılmış vəziyyətdə saxlanılması təşəbbüsünü dəstəkləyir, bunu milli-tarixi yaddaşın qorunası və təbliği baxımdan əhəmiyyətli hesab edirəm. Dağılmış binalar illər, əsrlər sonra da erməni vandalizmini ifşa etməkdə davam edəcək.
Bu qərarın özü onu göstərir ki, Azərbaycan xalqı heç vaxt ermənilərin törətdiyi vəhşilikləri unutmayacaq, beynəlxalq ictimaiyyətin bu vəhşiliklər haqqında daha dolğun məlumat alması üçün əlindən gələni edəcəkdir”
