“Heç kim gəlib nə yaşayışımla, nə də səhhətimlə maraqlanmır. Bilmirəm, bəlkə kiməsə pislik etmişəm?! Mənim heç kimə pisliyim dəyməyib, namusumu qoruyub, sənətimlə məşğul olmuşam. Sənət mənə nə verdi?! Heç nə! Ailəmi də, səhhətimi də puç etdi (ağlayır). Arxamca düşən kişi sənətçilərə “hə” deməyib, əxlaqımı, namusumu qoruduğuma görə bu günlərə qaldım. Mənə yaşatdıqlarını bu dünyada olmasa da onlar o biri dünyada yaşayacaqlar. Gecə-gündüz əllərimi göyə açıb, onları Allaha tapşırıram”
Bunu Moderator.az-a açıqlamasında “Lalə” qızlar ansamblının ilk solistlərindən biri, müğənni Elmira Əliyeva deyib. O daha sonra səhhətinin ağır olduğunu və şəraitsiz mənzildə yaşadığını bildirib.
“Nə iynə-dərmana pulum çatır, nə də çörək almağa pulum var. Özüm də xərçəng xəstəliyinə yoluxmuşam. Şəraitsiz mənzildə övladımla təkbaşına yaşayıram. Oğlum da işsizdir, o da evlənə bilmir. Yatdığım xəstəxanada həkimlər məni görüb tanıyır, oxutdururlar, oxutdurandan sonra müalicəmə başlayırlar. Onlardan çox razıyam. 82 yaşım var, bu yaşıma qədər nə qədər zülmlər çəkmişəm, bunu bir Allah bilir. Döyülüb söyülən, sonda da xəyanətə uğramış bir qadınam. Bu gün, sabah öləcəyəm, ölümə də sahib çıxan olmayacaq. Oğlumu da evləndirə bilmirəm, yaşıdlarımın nəticəsi var, amma mənim nəvəm də yoxdur. 15 il yazıb-pozuram. Mədəniyyət Nazirliyinə də, Bahar Muradovaya da, millət vəkilimiz Adil Əliyevə də müraciət etmişəm, heç bir köməklik görməmişəm. Bir dəfə Adil Əliyevin qəbuluna getdim 50 manat pul verdi, dedi ki, kömək edəcəyəm, bir kömək də görmədim. Mən heç nə istəmirəm, dilənçi deyiləm, haqqımı istəyirəm! Bir-iki verilişə çağırıb məni oxutdurdular, meymun kimi oynatdılar, amma bir kömək də görmədim. Hamı məndən istifadə edir, amma kömək edən yoxdur” deyə sənətçi gileylənib.
Sənətçi sonda bizdən kömək üçün nömrəsinin də saytda yayımlanmasını xahiş edib…. 050-304-78-05.
