İyulun 19-da Azərbaycanın işğaldan azad edilmiş Zəngilan rayonunun Ağalı kəndinə əhalinin köçürülməsinə start verilib.
Bununla bağlı Sobxeber.az-a danışan deputat Jalə Əhmədova bu gün əlamətdar bir hadisənin, Böyük Qayıdışın sevincini yaşadığımızı vurğulayaraq, xalqımızı təbrik edib:
“Doğma dədə-baba yurdlarından didərgin düşmüş zəngilanlılar bugünkü günün xoşbəxtliyini yaşayır və uzun illərdən sonra Müzəffər Ali Baş Komandanımızın qətiyyətli mövqeyi və Azərbaycan ordusunun qəhrəmanlığı sayəsində işğaldan azad edilmiş doğma torpaqlarına qayıdırlar.
Ağalıya ilk köçən vətəndaşlarımızı təbrik edirəm. Bu gün, onların 30 illik həsrətinə son qoyulur. Onlar Zəngilanda bütün infrastrukturun qurulduğu müasir bir kənddə, Ağalıda yaşayacaqlar. Məşğulluq, təhsil, səhiyyə, sosial məsələlərin təminatının yüksək səviyyədə olduğu Ağalı kəndini yaşadacaq, düşmənin barbarlığı nəticəsində darmadağın edilmiş torpaqları dirçəldəcək, bütün varlıqları ilə doğma dədə-baba yerlərini cənnətə çevirəcəklər.
Azərbaycan Prezidentinin yorulmaz fəaliyyəti nəticəsində irimiqyaslı quruculuq layihələrinin reallaşdırıldığı Qarabağ torpaqları öz doğmalarının yolunu gözləyir”.
