Sentyabrın 25-də “Ekonomiks” Beynəlxalq İqtisadi Araşdırmalar İctimai Birliyi ABŞ-ın Kaliforniya ştatının paytaxtı Sakramento şəhərində Kaliforniya Dövlət Kapitol Binasının yaxınlığında Şuşa ilinə həsr olunmuş növbəti tədbir keçirib. Alp.az xəbər verir ki, bu barədə “Ekonomiks” Beynəlxalq İqtisadi Araşdırmalar İctimai Birliyi rəhbəri iqtisad elmləri doktoru, professor Fikrət Yusifov saytımıza açıqlamasında bildirib.
“Bu tədbir həm də yerli erməni icmasının bir gün öncə, eyni yerdə, Azərbaycan ordusunun torpaqlarımızın bütövlüyü uğrunda apardığı son uğurlu əməliyyatlarına kölgə salmaq məqsədilə keçirtdiyi mitinqə tutarlı cavab oldu. Tədbir öncəsi yerli polis bölməsindən ermənilərin bir gün öncəki mitinqdə özlərini çox aqressiv aparması ilə bağlı xəbərdarlıq gəlsə də biz heç nədən çəkinmədən öz tədbirimizi öncədən düşündüyümüz kimi keçirtdik. Los Ancelesdəki Baş Konsulumuz Ramiz Daşdəmirovun və Konsulluğun digər üzvlərinin tədbirimizə qatılması isə bizi daha məmnun etdi. ABŞ-da Şuşa ilinə həsr olunmuş tədbirləri keçirib bir daha əmin oldum ki, biz öz haq səsimizi bütün dünyaya çatdırmaq üçün hələ çox iş görməliyik, hər yerdə birliyimizi formalaşdırmalıyıq.” -deyə Fikrət Yusifov bildirib.
