Dövlət Departamenti, İrandan “ciddi və etibarlı” təhdidlərlə üzləşən keçmiş dövlət katibi Mayk Pompeoya və keçmiş İran üzrə elçisi Brayan Huka 24 saatlıq təhlükəsizliyi təmin etmək üçün ayda 2 milyon dollardan çox pul ödənildiyini bildirib.
Alp.Az-ın “Military.com” saytına istinadən verdiyi məlumata görə, Departament Konqresə hesabatında bildirib ki, 2021-ci ilin avqustundan 2022-ci ilin fevralına qədər Pompeo və ABŞ prezidentinin İran üzrə sabiq elçisi Brayan Hukun müdafiəsi xərcləri 13,1 milyon dollar təşkil edib. Dövlət Departamentinin 14 fevral tarixli və “həssas, lakin təsnifləşdirilməmiş” hesabatını bu günlərdə “The Associated Press” əldə edib.
Pompeo və Hook Tramp administrasiyasının İrana qarşı “maksimum təzyiq” kampaniyasına rəhbərlik ediblər və hesabatda deyilir ki, ABŞ kəşfiyyatı hökuməti tərk etdikdən sonra onlara qarşı təhdidlərin sabit qaldığını və güclənə biləcəyini qiymətləndirir. Prezident Co Bayden administrasiyası ABŞ-ın 2015-ci ildə imzalanmış mühüm nüvə sazişinə qayıtması ilə bağlı İranla dolayı danışıqlara başlasa da, təhdidlər davam edir.
Keçmiş dövlət katibi kimi Pompeoya vəzifədən getdikdən sonra Dövlət Departamentinin Diplomatik Təhlükəsizlik Bürosu tərəfindən avtomatik olaraq 180 günlük mühafizə verilmişdi. Lakin bu qoruma Dövlət Katibi Antoni Blinken tərəfindən “keçmiş katib Pompeonun departamentdə işlədiyi müddətdə yerinə yetirdiyi vəzifələrdən irəli gələn xarici qüvvə və ya xarici gücün agenti tərəfindən ciddi və etibarlı təhlükəyə məruz qalması səbəbindən dəfələrlə 60 günlük artımlarla uzadılıb” – deyə hesabatda qeyd olunur.
Əlavə olunur ki, Tramp administrasiyasında İrana qarşı sərt mövqeyi ilə seçilən Brayan Huk da eyni şəkildə 24 saatlıq mühafizə ilə təmin olunub və bu təminatın dəfələrlə uzadılmasına qərar verilib.
Rüfət
