44 günlük Vətən Müharibəsində öz igidliyi və şücaəti ilə dastan yazan oğullarımızdan biri də Vətən müharibəsinin Komandanlarından biri, Vətən Müharibəsi Qəhrəmanı, general-mayor Kənan Seyidov idi. Döyüş generalımız ilk gündən başlayaraq döyüşlərdə iştirak etdi. Bu döyüşlərə qədər heç kimin tanımadığı Kənan Seyidov kimdir?
Kənan Seyidovun zabit dostlarından birinin dediyi kimi o elə doğulandan sərkərdədir. General Kənan Seyidov İkinci Qarabağ müharibəsi zamanı düşmənə qan udduran xüsusi təyinatlı qüvvələrin komandanlarından biri kimi şanlı döyüş yolu keçib.
Kənan Seyidov İmişli rayonu, Bəhrəmtəpə qəsəbəsində doğulub. 1991-ci ildən ordu sıralarında xidmət edir.
Kapitan Kənan Seyidov Azərbaycan Prezidenti Heydər Əliyevin 24 iyun 2003-cü il tarixli 887 nömrəli Sərəncamına əsasən “Azərbaycan Bayrağı” ordeni ilə təltif edilib.
Polkovnik-leytenant Kənan Seyidov Azərbaycan Prezidenti İlham Əliyevin 24 iyun 2014-cü il tarixli 575 nömrəli Sərəncamına əsasən “Vətən uğrunda” medalı ilə təltif edilib.
Polkovnik-leytenant Kənan Seyidov Azərbaycan Prezidenti İlham Əliyevin 19 aprel 2016-cı il tarixli 1967 nömrəli Sərəncamına əsasən “İgidliyə görə” medalı ilə təltif edilib.
2020-cilin noyabrında Prezident İlham Əliyev K.Ə.Seyidova general-mayor ali hərbi rütbəsinin verilməsi haqqında Sərəncam imzalayıb.
Azərbaycanın ərazi bütövlüyünün bərpa edilməsində xüsusi xidmətlərinə və işğal olunmuş ərazilərin azad olunması zamanı düşmənin məhv edilməsi üzrə qarşıya qoyulmuş döyüş tapşırığını yerinə yetirən zaman göstərdiyi qəhrəmanlıq nümunəsinə görə, həmçinin hərbi qulluq vəzifəsini yerinə yetirən zaman igidliyin və mərdliyin nümayiş etdirilməsinə görə Azərbaycan Prezidenti İlham Əliyevin 9 dekabr 2020-ci il tarixli Sərəncamına əsasən Kənan Seyidova “Vətən Müharibəsi Qəhrəmanı” adı verilmişdir.
2021-ci ilin iyulunda Prezident İlham Əliyevin sərəncamı ilə general-mayor Seyidov Kənan Əlihüseyn oğlu Xüsusi Təyinatlı Qüvvələr komandanının birinci müavini – qərargah rəisi vəzifəsindən azad edilərək, 5-ci Ordu Korpusunun komandiri təyin edilib.
Qoşqar Salmanlı
