Arzu Nağıyev: “Azərbaycan hər zaman dinindən, millətindən asılı olmayaraq, humanitar fəlakətlə üzləşən insanlara yardım edib”
Xəbər verdiyimiz kimi, valideyn himayəsindən məhrum olmuş 29 ukraynalı uşaq Azərbaycana gətirilib. Uşaqlar Bakı və Qəbələ şəhərlərində təşkil olunan 15 günlük düşərgədə sosial reabilitasiya keçəcəklər.
Xatırladaq ki, Azərbaycan bundan öncə də Ukrayanaya humanitar yardımlar göstərib, müharibədən əziyyət çəkən dinc insanların yaşam şəraitini yaxşılaşdırmağa çalışıb.
Moderator.az-a açıqlamasında valideynini itirən ukraynalı uşaqların ölkəmizə gəlişini şərh edən millət vəkili Arzu Nağıyev, Azərbaycanın hər zaman humanizm prinsipindən çıxış etdiyini bildirib:
“Bildiyiniz kimi, humanizm Azərbaycanda dövlət siyasətinin başlıca istiqamətlərindəndir. Humanizm həm də Azərbaycan xalqının mənəviyyatını, xarakterini xarakterizə edən əsas keyfiyyətlərdən biridir.
Valideynini itirmiş 29 ukraynalı uşağın ölkəmizə gətirilməsi, onların reabilitasiya prosesinə cəlb edilməsi bir daha dövlətimizin humanizmini, onun insan faktoruna verdiyi dəyəri göstərir. Bu fakt bir daha onu göstərir ki, Azərbaycan dövləti harada yaşamasından, hansı dinə, etiqada, mədəniyyətə, millətə mənsub olmasından asılı olmayaraq, köməyə ehtiyacı olan hər kəsə yardım etməyə, humanitar fəlakətlə üzləşən insanların həyatını xilas etməyə çalışır. Pandemiya dönəmində Azərbaycanın onlarla ölkəyə göstərdiyi yardım deyilənlərə nümunədir.
Bu baxımdan, 29 ukraynalı uşağın Azərbaycana gəlişini alqışlayır, bunu dövlətimizin ənənəvi humanizm siyasətinin növbəti təzahürü hesab edirəm”.
