Müasir mətbuatımızda öz dəsti – xətti, müəllif peşəkarlığı, obyektivliyi ilə sayılıb – seçilən nəşrlərdən biri də “Şərq” qəzetidir.
Müstəqilliyimizin ilk illərindən fəaliyyət göstərən bu qəzet milli mətbuat tariximizi dərindən araşdıran, bu yolda əzmkarlıq göstərən hörmətli dostumuz Akif Aşırlının rəhbərliyi ilə adını tarixə həkk edə bilib. Həmişə dövlət, dövlətçilik ənənələrinə sadiq qalan, obyektivliyi, mətbu qaydaları, müasir media ənənələrini həssaslıqla qoruyan “Şərq” qəzetinin ölkə ictimaiyyəti yanında xüsusi yeri vardır.
2018-ci ildə rəhbərlik etdiyim partiyanın bir qrup heyəti ilə “Şərq” qəzetinin baş redaktoru Akif bəyin öz təşəbbüsü və zəhməti ilə redaksiyada qurduğu Mətbuat Muzeyini ziyarət etmişdik. O muzeydə mətbuat tariximizə aid eksponatları, qəzet və kitabları, foto və rəsmləri gördükcə sevindim və Akif bəyin mətbuatımıza, mətbuat tariximizə necə önəm verdiyinin şahidi oldum. İnanıram ki, “Şərq” qəzeti və onun kollektivi indən belə də xalqımız, dövlətimiz, mətbuatımız üçün, həqiqətlərin geniş əhatəli işıqlandırılması yolunda çalışacaqlar.
Mən “Şərq” qəzetinin 25 illik yubileyi münasibəti ilə hörmətli Akif Aşırlı başda olmaqla bütün “Şərq” çiləri, redaksiya heyətini təbrik edir, fəaliyyətlərində uğurlar arzulayıram.
Razi Nurullayev
Milli Cəbhə Partiyasının sədri, millət vəkili
