Siyasi çevrələrdə daha çox “Putin NATO-su” adlandırılan KTMT-yə Ermənistanın iki il sədrlik etməsi ilə anti-Azərbaycan addımlar atılmasına səylər göstəriləcək. Lakin 44 günlük müharibə də təsdiqlədi ki, bu alyansın əsas ağası olan Rusiya KTMT-ni ölkəmizə qarşı yönəltmək fikrindən uzaqdır. Üstəlik, KTMT-də təmsil olunan digər dövlətlər Azərbaycanla yaxın münasibətlərə malik olduqları üçün İrəvana belə bir imkan tanımayacaqlar.

Bu arada erməni mediası yazır ki, Ermənistan 2018-2020-ci illərdə KTMT-nin güclənməsinə nə qədər “töhfə” veribsə, bundan sonra da eyni “töhfəni” verəcək. Burada söhbət Nikol Paşinyan hakimiyyətə gələndən sonra sözügedən təşkilata yönəlik aparılan aşağılama kampaniyasından gedir: “Təkcə 2018-ci ilin sentyabr-oktyabr aylarını xatırlatmaq kifayətdir. Ermənistan KTMT baş katibinin geri çağırılmasına ilk dəfə təşəbbüs göstərdi. Baş katib Yuri Xaçaturov barəsində cinayət işi açıldı. Ötən müddət ərzində KTMT-dən narazılıq məlum səbəblərdən daha da artdı. O vaxtdan Ermənistanda hakimiyyətdə olanlar dəyişməyibsə, o zaman KTMT-yə münasibətdə necə dəyişiklik ola bilər?”.

Görünən odur ki, Ermənistanın növbəti dəfə KTMT-yə rəhbərlik etməsinin hərbi təşkilat üçün yaxşı perspektiv vəd etməyəcəyi indidən görünməkdədir.

Məsələyə münasibət bildirən hərbi ekspert Ramil Məmmədlinin sözlərinə görə, Ermənistanın KTMT-yə rəhbərlik etməsi bu təşkilatın nüfuzuna növbəti zərbənin vurulacağı anlamına gəlir: “Bunu görməmk mümkün deyil. Ən azından ona görə ki, Nikol Paşinyan hakimiyyətinin bu təşkilata münasibəti bəllidir. Məsələ ondadır ki, 2018-ci ilin aprelində Nikol Paşinyan hakimiyyətə gələndən sonra ümumiyyətlə KTMT-yə qeyri-ciddi yanaşmağa başladı. Bir növ, bu təşkilatın onlar üçün vacib bir qurum olmadığını göstərməyə başladı. Bunun nəticəsi idi ki, KTMT-nin baş katibi geri çağırıldı, barəsində cinayət işi açıldı. Nəticədə KTMT-nin nüfuzu yerlə bir oldu. Bu, həm də Paşinyanın Rusiyaya yönəlik bir demarşı idi. Hər kəsə məlumdur ki, KTMT-nin əsas yaradıcısı Rusiyadır. Rusiyanın lokomotivi olduğu təşkilatın nüfuzdan salınması həm də Kremlin siyasətinə qarşı olan bir addımdır. Ondan sonra təşkilata Belarus təmsilçisi rəhbərlik etmək istəsə də, Paşinyan bunu bür müddət yubatdı. Əsas da o idi ki, Stanislav Zas Bakıda ali hərbi təhsil aldığı üçün Azərbaycanla yaxındır. Ermənistan hakimiyyəti ilə KTMT arasında münasibətlərin soyuqlaşmasının növbəti fazası ötən il Vətən müharibəsi dönəmində başladı. Heç bir beynəlxalq əsas olmadan Paşinyan müxtəlif vasitələrlə çalışdı ki, KTMT vəziyyətə müdaxilə etsin. Ancaq qurum döyüşlərin Azərbaycan ərazisində getdiyini əsas gətirərək İrəvanın istəklərini rədd etdi. Omdan sonra Paşinyan KTMT qüvvələrini Azərbaycan-Ermənistan sərhədinə yerləşdirmək təşəbbüsü ilə çıxış etdi. Buna da nail olmadığı üçün, erməni mediası davamlı olaraq təşkilata qarşı qaralama kampaniyası aparır. Bu isə Ermənistan cəmiyyətində KTMT-yə münasibətdə ciddi inamsızlıq mühiti yaradıb. Prosedur gərəyi Ermənistan 16 sentyabrdan KTMT-yə yenidən rəhbərlik etsə də, təşkilatdan Azərbaycana qarşı istifadə edə bilməyəcək. Ancaq Paşinyan KTMT-ni təşkilat olaraq zəif duruma salmaq və nüfuzunu aşağılamaq üçün bütün variantlara əl atacaq. Şəksiz, bu belə olacaq. Çünki Ermənistandakı hakim siyasi elita Qərbin maraqlarına oynayır”.

Hərbi ekspert onu da qeyd etdi ki, Paşinyanın KTMT-ni şantaj edəcəyi də istisna deyil.