Ermənistan parlamentinin müxalif “Ermənistan” və “Şərəfim var” fraksiyaları aprelin 5-də İrəvanda hökumətin hesablamalarına görə, təxminən 11 min, müxalifətin hesablamalarına əsasən isə 20 min insanın iştirakı ilə anti-Paşinyan mitinq təşkil etdi. Mitinqdə Serj Sarkisyan, Naira Zohrabyan, İşhan Saqatelyan və sairləri iştirak edərək Azərbaycan və Türkiyə ilə yeni danışıqlarla bağlı hakimiyyəti xəbərdar ediblər. Mitinq iştirakçıları İkinci Qarabağ müharibəsindən sonra ərazi bütövlüyünü bərpa edən Azərbaycana qarşı yenidən torpaq iddiaları irəli sürüblər.
İrəvanda müxalifətin keçirdiyi mitinq Brüssel görüşü ərəfəsində Nikol Paşinyan hakimiyyəti tərəfindən təşkil edilmiş tamaşadır. Əsas məqsəd ictimai rəyə əsaslanaraq danışıqlar zamanı özünü mümkün ssenarilərdən sığortalamaqdır. Ermənistanda bütün rəhbərliklər dövründə danışıqlar prosesini durdurmaq və zaman udmaq üçün bu kimi metodlardan geniş istifadə olunub. Lakin Paşinyan da, onun Qərbdəki havadarları da çox yaxşı bilirlər ki, artıq Qarabağ problemi həll olunub, geriyə yol yoxdur və əlavə şərtlər irəli sürmək cəhdlərinin heç bir səmərəsi olmayacaq. Gec-tez sülh müqaviləsi, sərhədlərin delimitasiyası, kommunikasiyaların açılması və digər məsələlərin həlli üzərində iş başlamalıdır. Bu, nə qədər tez olsa, Ermənistan üçün bir o qədər yaxşıdır.
Nəzərə almaq lazımdır ki, Prezident İlham Əliyevlə bütün görüşlərdə olduğu kimi, Nikol Paşinyan ötən il dekabrın 14-də Brüssel görüşü zamanı da zərbə aldı. Buna görə də Ermənistan baş naziri bugünkü görüşə xüsusi ümid bəsləməməli və bilməlidir ki, müqavimət cəhdləri növbəti yeni zərbə ilə nəticələnəcək.
Politoloq İlqar Vəlizadə Publika.az-a bildirib ki, İrəvanda müxalifətin keçirdiyi mitinq bir sıra məqsədlərə söykənir. Onun sözlərinə görə, müxalif fraksiyalar bu cür mitinqləri öncəki danışıqlar zamanı da keçiriblər, lakin burada da uduzan Ermənistan olacaq və bu cür kiçik tamaşalarla beynəlxalq ictimaiyyəti aldada bilməyəcəklər: “Münaqişə zamanı danışıqlar prosesi daha çox Madrid prinsiplərinin üzərində dayanmışdı və onların müəyyənləşdirilməsinə kifayət qədər çox vaxt getmişdi. Bundan sonra yenilənmiş Madrid prinsipləri ərsəyə gəldi. Daha sonra prinsiplərin üzərində başqa formulalar yaradıldı. Amma münaqişə yenə də həllini tapmamışdı. Bu mərhələdə də İrəvanda mitinqlər baş tuturdu. Madrid prinsiplərində Azərbaycan şərti razılığını verib, Ermənistan tərəfindən cavab gözləyərək 2020-ci ilin noyabrına gəlib çıxdı. Ancaq Azərbaycan tərəfi hazırda 5 prinsip ortaya qoyur. Biz qeyd edirik ki, ərazi bütövlüyü tanınmalı, sərhədlərin delimitasiyası və demarkasiyası prosesi başlamalıdır. Ancaq onlar bu prosesi uzadır. Ermənistanı himayə edən qüvvə və vasitəçilər yenə də bu məsələdə özlərinə sərf edən formada müdaxilə etsələr, təəssüf ki, gərginlik yaşanacaq. Burada da qeyd-şərtsiz uduzan Ermənistan olacaq”.
İ.Vəlizadə qeyd edib ki, həm İrəvandakı mitinqlər, həm də qondarma rejim başçılarının bəyanatları ermənilərin hazırkı vəziyyəti münaqişədən qabaqkı duruma gətirmək istəklərindən xəbər verir: “Münaqişədən əvvəlki məsələləri də yenidən gündəmə salmaq istəyirlər. Status məsələsini qabardırlar, qondarma rejim nümayəndələri “müstəqillik”dən danışırlar və bütün bunları müzakirə etmək istəyirlər. Təəssüflər olsun ki, vasitəçilər yenə də buna imkanlar yaratsalar, həmin çağırışlara uysalar və Ermənistanın nazı ilə oynasalar regionda gərginlik qaçılmaz olar. Ona görə də vasitəçilərdən də çox şey asılıdır. İndiki həssas mərhələdə onlar diqqətli olmalıdırlar”.
Politoloq hesab edir ki, Nikol Paşinyan bu mitinqdən və orada səsləndirilən fikirlərdən istifadə edərək bunu Brüsseldə xalqın tələbi kimi ön plana çıxarmaq istəyir: “Müxalifət Paşinyanı təslimçilikdə günahlandırır və ona müəyyən işarə edirlər və mesaj verirlər ki, guya təslimçilik siyasəti davam etdirilərsə, o, daxili gərginliklə üzləşəcək. Hadisələr də göstərir ki, Paşinyan dəfələlə müxalifəti meydanlarda, eyni zamanda seçkilərdə də udub. O, şərti olaraq nə qorxmalı, nə də çəkinməlidir. Paşinyan istəsə, yenə də imkanlar tapacaq ki, onlara başqa çıxış yolunun olmadığını sübut etsin. Sadəcə olaraq o, bunu istəyirmi? Belə bir təsəvvür yaranır ki, Ermənistan baş naziri bu mitinqlərdən istifadə edərək və orada qaldırılan məsələləri ön plana çəkərək Brüssel gündəliyində deyə bilər ki, “baxın, xalq bunu istəmir”. Bəlkə də Paşinyan üçün də bu lazımdır. Ancaq əgər istəsə, şərti təzyiqlərə baxmaya da bilər”.
