Xalq artisti Samir Cəfərovun müsahibəsini təqdim edirik:
– Samir müəllim, 44 günlük Vətən müharibəmizin bir ili tamam oldu. Bu sizin yaradıcılığınıza necə təsir etdi?
– Həqiqətən də bu bir şanlı tarixdir ki, biz bunu yaşadıq. Mən sevinirəm ki, bu tarixdə yaşayıram. Biz çox çətin bir dönəmlərdən keçdik. Burda təəssüf ki, böyük dövlətlərin diqtəsi daha çox rol oynayır. Ulu Öndər Heydər Əliyevin məşhur deyimlərini həmişə yadımda saxlayıram. Onun bir sözü var idi deyirdi ki, “iqtisadiyyatı güclü olan dövlət hər şeyə qadirdir”. Həqiqətən də Ulu Öndərimiz hakimiyyətə gələrək Azərbaycanı məhv olmaqdan qurtardı. O, bilirdi ki, Azərbaycan güclənəcək, iqtisadiyyatı güclü olacaq və öz dədə-baba torpaqlarını geri qaytarıb, ərazi bütövlüyünü təmin edəcək. Mən də daxilən buna inanırdım. Ali Baş Komandanımız isə bütöv Azərbaycanı təmin etdi. Hər şeydə bir məna var. Azərbaycan bir çox tədbirlər keçirdi, onun dünyaya tanıtımı olmalı idi. Azərbaycan uzun illər Çar Rusiyasının və SSRİ deyilən bir imperiyanın əsarəti altında olmuşdu. Sadəcə olaraq Azərbaycan adlı bir məmləkətin olması dünya və qərb üçün müəmmalı idi. O vaxtlar Azərbaycanı “Azərbaycan” mahnısıyla tanıdan Rəşid Behbudov idi. Amma Azərbaycan müstəqillik dövrünə keçəndən sonra biz torpaqlarımızı itirdik və başsız qaldıq. Xalqın təkidi ilə Ulu Öndər Heydər Əliyev hakimiyyətə gəldi, torpaqların işğal olunmasının qarşısını aldı və atəşkəs oldu. Bu illər ərzində isə Azərbaycan çox inkişaf etdi və bu günə qədər gəldi çıxdı. Siz baxın Azərbaycan Ordusu iyirmi birinci əsrin ordusu idi, amma onlar iyirminci əsrdə qalmışdı. Azərbaycanın iqtisadiyyatı da çox güclüdür. Siyasət, idman, mədəniyyət və bir çox sahələrdə çox uğurlu addımlar atıb və dünyaya özünü tanıdıb.
– Əldə etdiyimiz qələbəni hərə bir cür xarakterizə edir. Sizcə, bir xalq olaraq dünyaya özümüzlə bağlı hansı mesajları verdik?
– Müharibədən də sonra Azərbaycan özünün dünya masştabında güclü bir dövlət və ordusu olmağını göstərdi. 44 günlük müharibədə mən də şəxsən əsgərlərlə görüşdə oldum və Hadrutda iki konsert verdim. Noyabrın 22-də isə Şuşada konsert verdim və həmişə əsgərlərimizin yanında idim. Onlara həmişə mənəvi dəstək olurdum və bu da bir vətəndaş kimi mənim borcum idi. Hətta orda desəydilər ki, silahını götür döyüşə get, mən şərəflə Azərbaycanımız üçün gedərdim. Biz bu dövrdə o qədər həmrəy olduq ki, mən çox sevindim. Hamı həmrəy oldu. Ona görə də Azərbaycan bu müharibədə qalib gəldi. Yeni mahnılar yarandı. İndi oxuduğumuz mahnıların hamısını ürəkdən oxuyuruq. Bundan öncə biz o mahnıları oxuyanda bir gözümüz ağlayırdı, bir gözümüz isə gülürdü. Amma indi o mahnıları tam ürəklə oxuyuruq. Çünki sınmış qürurumuz bərpa olunub, bütövləşib və nəinki ermənilərin, bütün xalqların üzünə dik baxırıq. Bu da bizim oxuduğumuz əsərlərdə və ünsiyyətimizdə çox böyük rol oynayır.
– Şuşa torpağında olmaq necə bir hisdir?
– Xalq artistləri arasında birinci Şuşada mən olmuşam. Bununla bağlı videolar sosial şəbəkələrdə də var. Böyük Bülbülümüzün ev muzeyində sınmış heykəlinin qarşısında hərbi geyimdə ifa etmişdim. Abdulla Qurbaninin başçılıq etdiyi dəstəylə ora getmişdik. Şuşada olmaq böyük bir hisdir. Daşaltıdan “Kamaz”la Şuşaya qalxanda ürəyim çox döyünürdü. Bu neçə illərin torpaq həsrəti idi. Baxmayaraq ki, mən Naxçıvanda doğulmuşam, Qarabağı heç vaxt görməmişəm, ancaq bu illər ərzində özümü həmişə Qarabağlı hiss etmişəm. Bunu da etməliydik və çünki bu hislərimiz olmasaydı, Qarabağımıza qayıda bilməzdik. Buna görə də Ali Baş Komandanımıza minnətdarlığımızı bildiririk ki, bu hisləri bizə qaytardı. Mədəniyyətimizin beşiyi olan Şuşada “Xarıbülbül” festivalı keçirildi və bu da dünyaya bir mesaj idi. Azərbaycan tolerant dövlətdir, onun mədəniyyəti var, dünya çapında öz sözünü deyə biləcək bir xalqdır. Şuşada Heydər Əliyev Fondunun təşkilatçılığı ilə Üzeyir bəy günləri çərçivəsində əsərlər oxuduq və mən gözlərimə inanmadım ki, Bülbülün ev muzeyi qısa zamanda necə təmir edilib, gözəlləşdirilib. Mən düşünürəm ki, gələcəkdə Bülbülün ev muzeyi xaricdən gələn qonaqlar və bizim azərbaycanlılar üçün bir turizm məkan kimi ziyarət olunacaq.
– Bu gün hələ də fəxri ad almaq üçün öz gileyini bildirən müğənnilər var. Sizcə, bu adı almaq üçün müraciət etmək lazımdır, yoxsa qurumlar özləri necə seçim etdiklərini yaxşı bilirlər?
– İnsan birinci onu düşünməlidir ki, mən Azərbaycan mədəniyyəti, dövləti, Respublikası üçün nə etmişəm?! İnsan birinci bundan başlamalıdır. Yəni bir-iki mahnı oxuyub populyar olmaqla, ya da el şənliklərində maddi imkanlarını düzəltməklə tanınmaq hələ də sənətdə lazım olan nöqtəyə gəlmək demək deyil. Mən çox arzulayıram ki, onların iddiaları da qabiliyyətləri ilə paralel getsin. Bizdə təəssüf ki, iddialar qabiliyyətdən çox qabaqda gedir. Mən hamıya bu adı arzulayıram, amma sadəcə olaraq vaxt və iş görmək lazımdır. Hər insanı işinə görə dövlət başçımız qiymətləndirir, ona görə tələsmək lazımdır ki, yaxşı işlər görüb dövlət mənafeyinə, mədəniyyətinə xidmət edəsən ki, sən də fəxri ad ala biləsən.Moderator.az
