“Fevralın 22-də Azərbaycan və Rusiya prezidentləri arasında imzalanan müttəfiqlik haqqında bəyannamə bəzilər üçün təəccüblü görünə bilər. Amma əslində bu müqavilədə qeyd olunan bəzi məqamlar 1990-cı illərin əvvəllərində Müstəqil Dövlətlər Birliyinə daxil olan respublikalar arasında imzlanan kollektiv təhlükəsizlik müqaviləsində öz əksini tapıb. Azərbaycan və Rusiya arasında hərbi tədris və hərbi texniki sahədə əməkdaşlığın əsasını məhz həmin saziş qoyub. Sonralar ikitərəfli müəyyən razılaşmalar imzalansa da hərbi əməkdaşlığın baza hissəsi məhz qeyd etdiyim kollektiv təhlükəsizlik müqaviləsilə bağlıdır. Düzdür, sonralar kollektiv təhlükəsizlik müqaviləsi təşkilat formatına çevrildi. Azərbaycan bir müddət orada yer aldı. Sonradan isə 1997-ci ildə həmin təşkilatı tərk etdi. Amma bu, ikitərəli münasibətlərə xələl gətirmədi. Əksinə, son 20 il ərzində Azərbaycan və Rusiya arasında irimiqyaslı satınalma layihələri həyata keçirildi. Bəzi hallarda istehsal məsələləri həyata keçirildi. Azərbaycan üçün Rusiyada, Rusiya üçün isə Azərbaycanda bəzi müdafiə təyinatlı məhsulların istehsalı reallaşdırıldı”.
Bu fikirləri herbiand.az-a açıqlamasında Xəzər Müdafiə Tədqiqatları Mərkəzinin rəhbəri, hərbi ekspert Ramil Məmmədli deyib.
Ramil Məmmədli bildirib ki, hərbi-siyasi əməkdaşlığa gəldikdə isə, bu əməkdaşlıq regional proseslərin idarəolunması üçün olduqca vacib məsələdir:
“Burada xüsusi olaraq hər iki ölkənin milli maraqlarına cavab verən, 3-cü ölkələrə qarşı yönəlməyən ikitərəfli hərbi-siyasi əməkdaşlığın inkişaf etdirilməsindən söhbət gedir. Yəni, bu o deməkdir ki, Azərbaycan 3-cü ölkəyə qarşı Rusiyanın imkanlarından istifadə etməyəcək. Yalnız hər iki ölkəyə qarşı bir təhdid olarsa təhdidə məruz qalan ölkənin müraciəti əsasında digər ölkə ona dəstək ola bilər. Ümumilikdə, qarşılıqlı müqavilə qarşılıqlı hərbi-siyasi və hərbi texniki baxımdan əməkdaşlıq olduqca əhəmiyyətlidir. Yəni mövcud olan əməkdaşlığın daha da möhkəmləndirilməsinə xidmət edir. Biz soyuq başla düşünməliyik. Nəzərə almalıyıq ki, Rusiya regionun ən iri ölkəsidir. Onun üçün Azərbaycanla əməkdaşlığın mövcudluğunu genişləndirməsi çox ciddi məsələdir. Mən deyərdim ki, təkcə Azərbaycan deyil, Rusiya üçün də Azərbaycanla əməkdaşlıq olduqca maraqlıdır. Yəni, bu baxımdan hər iki ölkənin maraqlarının, əməkdaşlığının yeni müstəviyə qədəm qoyduğunu deyə bilərik”.
