Azərbaycan Respublikasının Prezidenti cənab İlham Əliyevin Gürcüstana səfəri ölkələr arasında əməkdaşlığın inkişafı baxımından mühüm əhəmiyyət kəsb edir. Səfər çərçivəsində müzakirə olunan məsələlər onu deməyə əsas verir ki, iki ölkə arasında münasibətlər yüksələn xətlə inkişaf edir. Şübhəsiz ki, 24 oktyabr tarixli səfər Gürcüstan və Azərbaycan arasındakı dostluq və qardaşlıq münasibətlərinə yeni təkan verəcək. Əlbəttə, bu münasibətlərin inkişafında Azərbaycan və gürcü xalqları arasında mövcud olan çoxəsrlik dostluq, qardaşlıq və mehriban qonşuluq münasibətlərinin xüsusi yeri və rolu vardır.
Bu fikirləri Moderator.az-a dövlət başçısının Gürcüstana səfərinin əhəmiyyətini şərh edərkən Milli Məclisin üzvü Tamam Cəfərova deyib.
Deputat açıqlamasında bildirib ki, Azərbayacan və Gürcüstan arasında əməkdaşlıq regional əhəmiyyətə malikdir. Bir çox icra olunan birgə layihələr təkcə iki ölkə üçün deyil, bölgə üçün, bütövlükdə Avropa üçün xüsusi əhəmiyyət daşıyır. Bu gün Azərbaycan və Gürcüstan arasında strateji tərəfdaşlıq əlaqələri müttəfiqlik səviyyəsinə qalxıb. Bir çox sahələr üzrə fəal əməkdaşlıq əlaqələri mövcuddur. Həm ikitərəfli formatda, həm də, beynəlxalq təşkilatlar çərçivəsində iki ölkə daim bir- birini dəstəkləyir.
Xüsusilə İkinci Qarabağ Müharibəsində Azərbaycanın qazandığı mühüm qələbə və regionda yaranmış yeni reallıqlar iki ölkə arasında münasibətlərin inkişaf dinamikasına təsir etmişdir. Qarabağ münaqişəsi başa çatdıqdan sonra Azərbaycan və Ermənistan arasında sülh müqaviləsinin imzalanmasının vaxtı gəlib çatıb. Azərbaycan hər zaman olduğu kimi sülhpərvər mövqeyini ortaya qoyub və Ermənistan tərəfinə sülh müqaviləsinin beş prinsipini təqdim edib. Əgər Ermənistan tərəfi konstruktiv mövqe nümayiş etdirər və təqdim olunan prinsipləri qəbul edərsə, Cənubi Qafqaza sülh gələcək və eyni zamanda, əməkdaşlıq üçün yeni imkanlar yaranacaqdır. Əgər Ermənistan tərəfi Gürcüstan-Azərbaycan-Ermənistan məsləhətləşmələrinə başlamağa hazırdırsa, Azərbaycan da buna hazırdır.
Millət vəkili Tamam Cəfərova fikirlərinin davamı olaraq qeyd edib ki, nəzərə almalıyıq ki, Azərbaycanın zəngin karbohidrogen ehtiyatları var. Azərbaycanın çox mühüm, irimiqyaslı enerji, nəqliyyat, logistika və digər layihələri var. Bu layihələr Gürcüstan ərazisindən keçir, bunun iki ölkə arasında iqtisadi əlaqələrin möhkəmlənməsi baxımından əhəmiyyətini görməmək mümkün deyil. Onu da deməliyik ki, Azərbaycan və Gürcüstan arasında ticarət dövriyyəsi əhəmiyyətli dərəcədə artmışdır. Əlbəttə, bu sevindirici haldır. Bu ilin 9 ayında qarşılıqlı ticarət dövriyyəsi bir milyard dollara yaxınlaşıb. Azərbaycanın sərmayəsi ilə həyata keçirilən layihələr bizim əməkdaşlığımızı daha da gücləndirir. Azərbaycan Gürcüstana 3 milyard dollardan çox sərmayə qoyub. Bu sərmayə qarşılıqlı faydalı sərmayədir, çünki hər iki tərəfin maraqlarına cavab verir.
Dünyada olduqca mürəkkəb siyasi proseslərin getdiyi bir vaxtda, xüsusilə də Rusiya-Ukrayna müharibəsi fonunda yaranan ərzaq böhranı nəticəsində Xəzər dənizi üzərindən Azərbaycan, Gürcüstan və qonşu ölkələrdən keçən nəqliyyat yollarına böyük ehtiyac var. Yeni nəqliyyat yolları həm geosiyasi vəziyyətlə bağlıdır, həm də bütövlükdə yol boyunca yerləşən bütün ölkələrin maraqlarına cavab verir. Ona görə Bakı-Tbilisi-Qars dəmir yolunun ötürmə qabiliyyətinin 5 milyon tona çatdırılması, eyni zamanda, Gürcüstan limanlarından istifadə edərək Orta Asiyadan və bütövlükdə Asiyadan Qərb istiqamətinə və əks istiqamətə ötürülən yüklərin həcminin artırılması artıq yeni reallıq yaradır. Hazırda Azərbaycan və Gürcüstan arasında mövcud olan sıx əməkdaşlığa Avropanın ehtiyacı var. Enerji resurslarına bütövlükdə dünyada və Avropada böyük tələbat olduğu üçün Gürcüstanla Azərbaycan da bu məsələdə bir cəbhədən hərəkət edərək, bir nöqtəyə vuraraq öz milli maraqlarını təmin edəcəklər. Onu da deməliyik ki, Gürcüstan Baş nazirinin çıxışında dövlət Başçımızın Praqa təşəbbüsünü Gürcüstanın dəstəklədiyini açıq ifadə etməsi iki ölkənin ortaq maraqlarının təzahürü kimi qiymətləndirmək olar.
