Prezident İlham Əliyevin tapşırığı ilə Azərbaycan Ordusunun Türkiyə Silahlı Qüvvələrinin standartlarına uyğunlaşdırılması istiqamətində həyata keçirilən tədbirlər çərçivəsində hərbi təhsil sahəsində idarəetmənin təkmilləşdirilməsi məqsədilə Milli Müdafiə Universiteti yaradılıb. Bu barədə Azərbaycan Müdafiə Nazirliyindən bildirilib. Universitetin rəhbərliyinə məşhur general-leytenant Heydər Piriyev təyin edilib.
Rəsmi məlumatda qeyd edilib ki, əvvəllər mövcud olan Silahlı Qüvvələrin Hərbi Akademiyası, Heydər Əliyev adına Azərbaycan Ali Hərbi Məktəbi və digər xüsusi təyinatlı təhsil müəssisələri öz fəaliyyətlərini yeni yaradılan Milli Müdafiə Universitetinin nəzdində Hərbi Elmi-Tədqiqat İnstitutu, Hərbi İdarəetmə İnstitutu, Heydər Əliyev adına Hərbi İnstitut, Azərbaycan Ordusunun Təlim və Tədris Mərkəzi, Heydər Əliyev adına Hərbi Lisey, Cəmşid Naxçıvanski adına Hərbi Lisey və Tibb Universitetinin Hərbi Tibb Fakültəsi adı altında fəaliyyət göstərirlər. “Aparılan struktur islahatları çərçivəsində ordumuzda elm və hərbi təhsil sahəsi daha da uğurlu inkişaf edir”, – məlumatda deyilir.
Hərbi icmalçı Ramil Məmmədli bu təyinatı uğurlu sayır: “Heydər Piriyev Azərbaycan Ordusunun tərkibində Silahlı Qüvvələr yarandığı gündən bu günə qədər zabit kimi xidmət edib. Onun ordumuzun zabitlərinin yetişdirilməsində böyük əməyi olub. O, Azərbaycan Silahlı Qüvvələrinin Ali Hərbi Məktəbinin ən tanınmış və uğurlu rəislərindən biri idi. Hansısa səbəbdən onu sonralar gənc zabitlərin yetişdirilməsi prosesindən uzaqlaşdırdılar. Ora tamamilə bu proseslərə aidiyyəti olmayan şəxs təyin olundu. Heydər Piriyev qoşun xidmətində də uzun müddət xidmət edib. Birbaşa ön cəbhədə xidmətdə olub. Ordunun formalaşdırılmasında iştirak edib. Heydər Piriyevin bu cür mühüm posta təyin olunması uğurlu qərardır. O, həm sovet hərbi tədris sisteminə yaxşı bələddir, həm də Türkiyə, bütövlükdə NATO hərbi sisteminə bələdçiliyi var”.
Hərbi icmalçı Milli Müdafiə Universitetinin yaradılmasının önəminə xüsusi yer ayırdı: “Azərbaycanda Daxili İşlər Nazirliyini çıxmaq şərtilə-çünki ora spesifik sahədir-digər qurumların ayrı-ayrılıqda ali hərbi məktəbinin, akademiyasının olması doğru deyil. Məsələn, Dövlət Sərhəd Xidmətinin ayrı akademiyası var, Fövqəladə Hallar Nazirliyinin də ayrıca akademiyası mövcuddur. Bu formada proseslərə yanaşma doğru deyil. Bu baxımdan hesab edirəm ki, Milli Müdafiə Universitetinə həmin adını çəkdiyimiz qurumların da tədris müəssisələri birləşdiriləcək. Azərbaycan çox da böyük ölkə olmadığından bunlar bir mərkəzdən idarə olunacaq. Əslində bu universitetin yaradılması və digər tədris müəssisələrinin orada birləşdirilməsi çox uğurlu qərardır. 2014-cü ildə Zakir Həsənov nazir təyin olunandan sonra bir sıra yeniliklər həyata keçirildi. Bunlardan biri Azərbaycanın daha əvvəllər yaradılan və böyük tarixi olan Hərbi Dənizçilik Məktəbinin ləğv edilərək fakültə səviyyəsinə salınması oldu, Ali Hərbi Məktəbin quru qoşunları üçün zabit heyəti yetişdirən ümumi məktəbə daxil olundu. Naxımov adına Hərbi Dənizçilik Məktəbinin böyük ənənəsi var. Bu məktəbi bitirən onlarla yüksək çinli zabitlər var. Keçmiş postsovet məkanında nümunəvi məktəblərdən biri idi. Dünya hərbi dənizçilik sistemini mükəmməl şəkildə öyrədən bir qurumdur. Bunları deməkdə məqsədim odur ki, Milli Müdafiə Universiteti o zaman effektli olacaq ki, belə incə məqamlara diqqət yetiriləcək. Sözdə deyil, əməldə praktiki olaraq zabitlərin formalaşdırılması, yetişdirilməsinə xidmət ediləcək. Həmçinin hərbi, elmi bazanın formalaşdırılması, hərbiçilərin siyasi biliklərinin daha da artırılması üçün peşəkar hərbi icmalçıların həmin müəssisəyə dəvət olunaraq, onların bilik və bacarıqlarından istifadə edilməsi çox müsbət olardı. Bütün bunların hamısı kompleks şəkildə edilməlidir. Bu baxımdan qurumun özünün yaradılması, binasının inşa olunması, əsasnaməsinin formalaşdırılması hələ o qurumun effektli olması deyil. Burada Müdafiə Nazirliyinin üzərinə olduqca ciddi məsuliyyət düşür. Heydər Piriyev müstəqil qərarlar qəbul edərsə, müəyyən ola biləcək təzyiqləri önləyə bilərsə, bu qurumun effekti olacaq. Etiraf edək ki, Müdafiə Nazirliyində Heydər Piriyev kimi peşəkar hərbiçilərə münasibət heç də hər zaman olduğu kimi birmənalı olmur. Bunları mütləq nəzərə almaq lazımdır”.“Yeni Müsavat”
