Ermənistan “gorbagor olmuş status”u yenidən diriltmək istəyir. Açıq-aydın görünür ki, Ermənistan rəhbərliyi 44 günlük müharibdən dərs çıxartmayıb və kiflənmiş, “cəhənnəmə vasil edilmiş” “müstəqillik” nağıllarını masaya daşımağa çalışır.
Ermənistanın xarici işlər naziri Ararat Mirzoyan Moskvada Rusiya XİN rəhbəri Sergey Lavrovla görüşdə də bir daha ənənəvi sərsəm fikirlərini səsləndirib. Mirzoyan deyib ki, bu mərhələdə Ermənistanla Azərbaycan arasında sülh razılaşması üzrə hər hansı danışıqlar aparılmır. Onun iddiasına görə, bu danışıqlardan öncə “mütləq Dağlıq Qarabağın statusu müəyyənləşdirilməlidir”, özü də Minsk Qrupu həmsədrlərinin iştirakı ilə. Ermənistan XİN başçısı ardınca Azərbaycanı “destruktiv fəaliyyətdə” günahlandırıb. Bütün bunlar ondan xəbər verir ki, Ermənistandakı komanda dəyişiklikləri də bu xəstə toplumun zehniyyətində hər hansı irəliləyişlərə səbəb olmayıb, çünki yeni-köhnə komandanın üzvləri də revanşist meyllərə kökləniblər.
Prezident İlham Əliyevin statusla bağlı müharibə dövründən bəri ortaya qoyduğu mövqe dünyaya aydındır. Həmçinin Minsk Qrupu və həmsədrlərlə bağlı da mövqeyini dəfələrlə bildirib. Azərbaycanın dövlət başçısının “gorbagor oldu status, cəhənnəmə getdi status” bəyanatı hələ də qüvvədədir. Elə isə bəs Ermənistan rəsmisinin İ.Əliyevin bu qətiyyətli mövqeyini bildiyi halda belə sərsəm bəyanat səsləndirməsinin səbəbi nədir? Faktiki olaraq nə hərbi, nə siyasi, nə diplomatik, nə iqtisadi, nə də geopolitik vəziyyət ermənilərin xeyrinə deyil. Görünən budur ki, Rusiya Ermənistanın arxasından çəkilib, Lavrovun Mirzoyanla görüşdəki tavrı da bunu bir daha isbatladı. Hər zaman ermənilərdən və Ermənistandan yana olan Lavrov bu dəfə xeyli obyektiv görünürdü. Onun “hərbi əsir” adlandırılan erməni diversantlarla bağlı dedikləri, bu şəxslərin 9 noyabr bəyanatının imzalanmasından sonra saxlanmasını xatırlatması da maraqlı məqam oldu. Lavrov qeyd edib ki, 9 noyabr razılaşması barışıq əldə olunduğu zamankı əsirlərə aid olub, hazırda Azərbaycan əsirliyində olanlar ora barışıqdan sonra – 2020-ci ilin noyabr ayının sonlarında düşüblər. Düzdür, S.Lavrov Azərbaycanın maraqlarına uyğun olmayan mövqeyindən də qalmadı, amma bu, təəccüblü deyil, çünki onu tanıyırıq. Amma damarlarından erməni qanı axdığını şəxsən etiraf etmiş bir adamın bu gün ermənilərin mövqeyinə zidd münasibət açıqlaması həm də Moskvanın Ermənistanla bağlı yürütdüyü siyasətin məntiqi nəticəsidir. Demək, bu, həm də Rusiya dövlətinin, prezident Putinin mövqeyidir. O mövqeyə Lavrov da tabe olub…
Biz Rusiya XİN rəhbərinin 2017-ci ilin yanvarında dediyi “Dağlıq Qarabağ Azərbaycanın daxili işi deyil” açıqlamasını da unutmamışıq. Hər halda, kifayət qədər mövqe dəyişikliyini müşahidə edirik. Lavrov hərbi əsirlərin azad edilməsilə bağlı 9 noyabr razılaşmasının pozulmasında Bakını ittiham edən erməni jurnalistin sözlərinə düzəliş edib.
Rusiya baş diplomatının belə Ermənistanın maraqlarına xidmət etməyən mövqeyi ortada olduğu halda, rəsmi İrəvanın sərt ritorikaya üstünlük verməsi suallar doğurur. Ermənistan bu cəsarəti haradan alır? Düzdür, həmsədrlərin yenidən dövriyyəyə girməsi planı əslində Moskva, Paris və Vaşinqtona məxsusdur, ermənilər, sadəcə, oyunçu rolunu oynayırlar, davamlı təxribatlar da bunun əlamətidir. İki gün əvvəl rusiyalı yeni həmsədrin Bakıya gələrək, Azərbaycan XİN rəhbəri Ceyhun Bayramovla görüşməsi də 28 il fəaliyyətsiz qalmış diplomatların bir daha “bəxtlərini sınamaq” istəyinin ilkin əlamətidir. Şübhə yox ki, rəsmi Bakınıın prinsipial mövqeyi həmsədr ölkələri qıcıqlandırdığı üçün müxtəlif təzyiq elementlərindən istifadəyə çalışırlar, Qarabağda və sərhəd bölgələrindəki erməni təxribatları isə sadəcə “aysberqin görünən üzüdür”.
Bu arada Ermənistanın müdafiə naziri Arşak Karapetyan bir sıra hərbi hissələrdə olub, orada əsgərlərin məişət şəraiti və onların peşə hazırlığının təşkili ilə tanış olub.Bu barədə Ermənistan Müdafiə Nazirliyinin mətbuat xidməti məlumat yayıb. Qeyd olunur ki, Karapetyan bölmələrdə tədris prosesi ilə də tanış olub, hərbi hissələrdə sosial-məişət şəraitinə, habelə hərbçilərin qidalanmasının təşkili şəraitinə xüsusi diqqət yetirib. O, həmçinin komandanlığa bunu nəzarətdə saxlamağı tapşırıb. Bundan əlavə, müdafiə idarəsinin rəhbəri üç aylıq yığımların həyata keçirildiyi bir sıra sahələrdə də olub. Karapetyan ehtiyatçılarla görüşərək, onlarla söhbət edib. “Armenian News” portalı yazır ki, görüş əsnasındakı çıxışında “Biz müharibəni uduzmamışıq, döyüşü uduzmuşuq”, – deyə, o, hərbi qulluqçulara müraciət edib. Bu tip çıxışları ilə yadda qalan Ermənistan rəhbərliyi Azərbaycanı təxribata çəkmək istəyini açıq-aşkar ortaya qoyur. Bölgədə sülhün bərpasına çalışan Azərbaycanı isə dağıdıcı, sülhün yaradılmasına təhlükə yaradan ölkə kimi dünyaya tanıtmağa çalışırlar.
Ceyhun Məmmədov: “Ermənistan 44 günlük müharibədən və acı məğlubiyyətdən nəticə çıxarmayıb, dəmir yumruq hər an hazır olmalıdır”
Deputat Ceyhun Məmmədovun fikrincə, bu, bir daha onu göstərir ki, Ermənistan 44 günlük müharibədən və acı məğlubiyyətdən nəticə çıxarmayıb, dəmir yumruq hər an hazır olmalıdır: “Prezident İlham Əliyev dəfələrlə bu məsələyə toxunub. Status məsələsi artıq bitib! Ermənistan birdəfəlik bunu anlamalıdır. ATƏT isə yaddaşlarda yalnız fəaliyyətsizliyi ilə qalıb”.
C.Məmmədov qeyd etdi ki, əgər Ermənistan 10 noyabr razılaşmasını icra etməkdən və sülh müqaviləsini imzalamaqdan imtina etsə, onun üçün bunun nəticəsi çox ağır olacaq: “Buradan belə bir ritorik sual yaranır: əgər Ermənistan belə təxribatlara davam etsə və Azərbaycanla müharibəyə başlasa, hansı ordu və texnika ilə müharibə edəcək? Silah və texnikalarının böyük əksəriyyəti Hərbi Qənimətlər Parkında saxlanılan, 44 günlük müharibədə 10 min fərarisi olan ordu ilə? Ona görə Ermənistan müharibə barədə yox, sülh və bölgə ölkələri ilə əməkdaşlıq barədə düşünməlidir. Bu ölkə müharibə ritorikası ilə danışmağın nəticəsini gördü. Nə qədər gec deyil, Ermənistan tərəfi nəticə çıxardın!”
“Əsirlər” məsələsinə gəldikdə isə deputat qeyd etdi ki, bunun da birbaşa günahkarı Ermənistandır: “Rusiya XİN rəhbərinin də dediyi kimi, bu əsirlər 10 noyabr razılaşmasından sonra əsir götürülüblər. Onların həmin tarixdən sonra o ərazilərdə nə işləri var idi? Azərbaycan öz prinsipial mövqeyində haqlıdır. Əgər Ermənistan bunun baş verməməsini istəyirdisə, o zaman diversantları Azərbaycan ərazisinə göndərməməliydi. Bir sözlə, Ermənistanın şansı tükənmək üzrədir. Azərbaycanın da səbrinin həddi-hüdudu var. Ermənistan yalnız vaxt itirir”.
Ermənistanın siyasi rəhbərliyinin saxta iddialardan əl çəkməməsi, ötənlərdən dərs çıxartmaması sınıq-salxaq erməni ordusunu da növbəti təxribatlara sövq edir.
Ermənistan sərhəd bölgəsində atəşkəsi davamlı pozmaqla həmsədrlərin regiona gəlişinə “yaşıl işıq” yandırmağa çalışır, amma anlamaq istəmir ki, bu, ona baha başa gələ bilər. Növbəti müharibə Ermənistanın varlığını sual altında qoyacaq, heç şübhəsiz. Görünür, buna görədir ki, Ermənistan XİN rəhbəri Moskvada olarkən həm Rusiya rəhbərliiyi, həm də KTMT-nin baş katibi ilə bir araya gəlib. Ermənilər həm qorxur, həm də “qorxutmağa” cəhd edir.
Arzu Nağıyev: “Əks halda, artıq tək Zəngəzur deyil, digər tarixi torpaqlarımız da bizim nəzarətimizə keçəcək”
Deputat, Milli Məclisin Müdafiə, Təhlükəsizlik məsələləri və korrupsiyaya qarşı mübarizə komitəsinin üzvü Arzu Nağıyevin fikrincə, Ermənistan və rəhbərliyi, onun havadarları bilirlər ki, müharibə etmək iqtidarında deyillər: “Müharibə etmək üçün ciddi maddi vəsait, ordu və ruh yüksəkliyi lazımdır. Bunların heç biri Ermənistanda yoxdur. Real durum belədir: dağılmış iqtisadiyyat, tənəzzül etmiş ordu, inamsız vətəndaş”. A.Nağıyev hesab edir ki, düşmən ölkə, sadəcə olaraq, öz vətəndaşlarını sakitləşdirmək üçün siyasi gedişlər edir: “Parlamentdəki son hadisələr də bunu göstərdi. KTMT-yə rəhbərliyi ələ almaq hələ nəyəsə nail olmaq deyil. Qurumda təmsil olunan hər bir ölkə də Ermənistanın siyasətinin və hərbi gücünün hansı durumda olduğunu dəqiq bilir”. Deputat ermənilərin növbəti təxribatına diqqət çəkdi: “Məlumdur ki, sentyabrın 2-də qondarma qurum ”müstəqillik” gününü qeyd etmək istəyir və oraya kimlərisə gətirməyə çalışır. Hətta Ermənistan rəhbərliyi gəlməkdən imtina edir və təbii ki, qorxur. Azərbaycan Müdafiə Nazirliyinin son bəyanatı da – istənilən təxribata adekvat olaraq cavab veriləcək – ikiqat təşviş yaradıb. Buna görə də hansısa real savaşdan söhbət gedə bilməz. Əks halda, artıq tək Zəngəzur deyil, digər tarixi torpaqlarımız da bizim nəzarətimizə keçəcək! Bir sözlə, daxili və xarici auditoriyaya hesablanan siyasi gedişlər Ermənistanın necə bir acınacaqlı durumda olduğunun bariz göstəricisidir”.
Ötən həftə Azərbaycan ordusunun Qubadlı ərazisindəki hərbçilərinə qarşı terror aktı törədən erməni canilərinin cəzalandırılması tələbilə ordumuz möhtəşəm tədbirə əl atdı. Belə ki, delimitasiya və demarkasiya nəticəsində Azərbaycan ərazinə düşmüş Gorus-Qafan yolunun 21 km-lik hissəsi qapadıldı və Ermənistan çarəsiz duruma düşdü. Virtualaz.org-un məlumatına görə, Ermənistanı İranla birləşdirən Gorus-Qafan yolunun Azərbaycanın Qubadlı rayonunun ərazisindən keçən hissəsində hərəkət elə təşkil olunub ki, ermənilər daha bu yoldan sürətlə keçib gecə bilməyəcəklər. Onlar Azərbaycan sərhədçilərinin postlarının yanında sürəti minimuma endirməli və beton blokların arasından keçib getməlidir. Xatırladaq ki, yol Azərbaycan sərhədçisinə edilən hücumun ardınca bağlanmışdı və nəticədə Ermənistanla İran arasında əsas quru əlaqəsi də kəsilmişdi. Rusiya tərəfinin iştirakı ilə üç gün davam edən danışıqlardan sonra Azərbaycan tərəfi yenidən yolu açdı, amma sərhədçilərin postlarının yanında hərəkəti beton bloklarla məhdudlaşdırdı. Ermənistanda nəşr olunan “Hraparak” qəzeti yolun əslində “qismən açıldığını” yazır. Belə ki, azərbaycanlılar iki-üç yerdə magistrala beton bloklar düzüblər və hərəkəti məhdudlaşdırıblar. Beton bloklar Azərbaycan sərhədçilərinin postlarının qarşısında qoyulub. “Bizim mənbələrimiz deyirlər ki, yolun bu hissəsini keçərkən maşınların hərəkət sürəti minimuma endirilir, çünki ziqzaqvari beton blokların qoyulması nəticəsində hərəkət üçün ancaq dar zolaq açıq qalıb. Sürət minimuma endirildiyindən Azərbaycan tərəfi yoldan keçənləri çox rahatlıqla identifikasiya edə bilər və bu da əlavə risklər yaradır. İndi adamlar ya bu yoldan keçməməyə çalışacaqlar, xüsusən də ona görə ki, Milli Təhlükəsizlik Xidməti bir neçə ay əvvəl sürücüləri bu yolu dayanmadan, sürətlə keçməyə çağırmışdı”, – qəzet yazır. Bildirilir ki, ola bilsin Ermənistan rəhbərliyi yolun açılması üçün hansısa öhdəlik də götürüb, amma bunun nədən ibarət olduğu gələcəkdə üzə çıxacaq. Qeyd etdiyimiz kimi, Gorus-Qafan yolunun bəzi hissələri hələ sovet dövründə Azərbaycan ərazisindən, Qubadlıdan çəkilib. Ötən ilin noyabrında Azərbaycan Qubadlı və Zəngilan istiqamətlərində öz dövlət sərhədlərini bərpa edəndən sonra yol Azərbaycanın nəzarətinə keçib. Amma Bakı xoş məram nümayiş etdirərək alternativ yol çəkilənə qədər yolun bu hissələrindən hərəkətə icazə vermişdi. İndi yolda hərəkətin beton bloklarla bir neçə hissədə məhdudlaşdırılması Azərbaycan tərəfinə imkan verəcək ki, onun ərazisindən daşınan yüklərə də qismən nəzarət edə bilsin. Çünki aylardır belə məlumatlar və faktlar yayılır ki, İrandan Ermənistana, oradan isə Rusiya sülhməramlılarının nəzarətində olan Azərbaycan ərazilərinə şübhəli yüklərlə dolu TIR-lar hərəkət edir.
Belə bir acınacaqlı, çarəsiz durumda olan Ermənistanın Azərbaycanın qarşısına şərt qoymağa cəsarət etməsi anormallığın nəticəsidir. 44 günlük müharibədən əvvəl Nikol Paşinyan Azərbaycanın qarşısında 7 şərt qoymuşdu. Azərbaycan rəhbərliyi isə bu şərtlərin qarşılığında bəyan etdi: bizim bir şərtimiz var: torpaqlar azad edilməlidir! Dedi və tələbi yerinə yetirildi. İndi kapitulyasiyaya imza atmış ölkənin “status” söhbəti etməsi, gərginliyi tətikləməsi ölkəsinin tamamilə məhvinə aparan davranışdır…“Yeni Müsavat”
