“Ermənilərin Azərbaycan-Ermənistan sərhədində son günlər ard-arda sıralanan təxribatları ona yönəlib ki, Avropa Missiya Kontingenti geniş tərkibdə təmsil olunsun. Nəticə etibarı ilə Qərbin Ermənistana daxil olması həm sürətləndirilsin, həm də onların missiyası geniş tərkibdə icra edilsin. Ermənistan tərəfi düşünür ki, Zəngəzuru və 29,8 min kvadrat kilometrlik ərazini “qorumaq” üçün mütləq şəkildə bu üsuldan istifadə etmək lazımdır”.
Alp.az xəbər verir ki, bunu Publika.az-a açıqlamasında politoloq Zaur Məmmədov deyib.
Ekspert son günlər Azərbaycan-Ermənistan sərhədinə qoşun cəmləşdirən və silsilə şəkildə təxribatlara əl atan qarşı tərəfin digər məkrli planlarından da danışıb:
“Amma əslində bu, çox təhlükəli bir oyundur. Ermənistan əgər 29,8 min kvadrat kilometrlik ərazini qorumaq istəyirsə, o zaman tamamilə açıq formada öz cəmiyyətinə və dünyaya məsələni olduğu kimi izah etməlidir. Çünki Ermənistanda hakimiyyətr dəyişə bilər. Belə olan halda tərəflər arasında imzalana biləcək sülh müqaviləsini yeni hakimiyyət müxtəlif cür interpretasiya edə bilərlər. Biz burada erməni xislətini mütləq şəkildə nəzərə almalıyıq. Əgər Ermənistan doğrudan da sülh istəyirsə, Qarabağın Azərbaycanın tərkib hissəsi olmasını açıq şəkildə beynəlxalq aləmə bəyan etməlidir. İrəvan bu məsələdə ikibaşlı siyasət yürütməməlidir. Öz daxili auditoriyasından da heç nəyi gizlətməməlidir”.
Zaur Məmmədov düşünür ki, hazırda Qarabağ məsələsinin Azərbaycanın daxili işi olması ilə bağlı Ermənistan tərəfinin öhdəliyi var:
“Bu öhdəlik sonuncu Praqa görüşündə, Fransa prezidenti Makronun da iştirak etdiyi toplantıda Ermənistanın baş naziri Nikol Paşinyan tərəfindən qəbul olunub. Məsələ burasındadır ki, Makronun timsalında Fransa və Amerikadakı bəzi demokratlar, eləcə də bir sıra xarici qüvvələr reallıqla barışmaq istəmirlər. Buraya Ermənistandakı radikal müxalifəti və Qarabağdakı separatçıları da daxil etmək lazımdır. Onlar “status” və “müstəqillik” məsələlərindən bundan sonra da istifadə etmək niyyətindədirlər. Hər halda, bizim qarşımızda dayanan hər kəs başa düşməlidir ki, 1920-ci ilin xəritələrini – 1929, 1974 və 1980-ci illərin xəritələrini nəzərdə tuturam –komunistlərin beynəlxalq hüquqa əsaslanmayan, qeyri-qanuni hesab etsək, o zaman 1920-ci il xəritələrinə qayıtmalıyıq. 1920-ci ilin 30 noyabrına qədər Azərbaycan Xalq Cümhuriyyəti ilə Ararat Respublikası SSRİ-yə daxil olarkən ərazilərini əsas götürməliyik”.
Politoloq bildirib ki, o dövrdə bizim 114 min kvadrat kilometr, Ararat Respublikasının isə 9 min kvadrat kilometr ərazisi var idi:
“Bu isə o deməkdir ki, biz Ermənistan ərazisindəki təxminən 20 min kvadrat kilometrlik ərazinin sual altında olmasını və həmin ərazilərin Azərbaycana məxsusluğunu qeyd etməliyik. Bizim sərhədlərimiz Göyçə gölündə, Mehridə olmalıdır. Buna heç kim şübhə ilə yanaşmasın. Çünki biz Cənubi Qafqazda ədaləti bərpa etməkdəyik. Ədalət isə yalnız və yalnız bu yolla ola bilər. Göyçə və Qərbi Zəngəzur Azərbaycanın təhlükəsizlik kəməri olacaq. Bununla da ermənilər Qarabağla bağlı iddialardan və Qarabağ ətrafındakı təxribatlardan əl çəkəcəklər. Ermənilər bu ssenari ilə razılaşmırsa, o zaman Qarabağın Azərbaycanın tərkib hissəsi olmasını birdəfəlik dünyaya bəyan etməlidirlər. Bununla da məsələ bağlanmalıdır. İran tərəfi sərhədlərin dəyişdirilməsinə həssaslıqla yanaşdığını deyirsə, o zaman Qarabağın Azərbaycanın tərkib hissəsi olması ilə bağlı İrəvana təzyiqlər göstərməlidir. Əgər Tehran İrəvana bununla bağlı təzyiq etməsə, o zaman Azərbaycan Bayrağını lazım olan sərhədlərdə görəcəklər”.
