Bu fikirləri AZƏRTAC-a açıqlamasında Milli Məclisin deputatı, Bakı Dövlət Universitetinin kafedra müdiri professor Kamilə Əliyeva deyib.
Deputat Ermənistan rəhbərliyinin Azərbaycan xalqının iradəsini, Azərbaycan dövlətinin potensialını düzgün qiymətləndirərək konstruktiv mövqe nümayiş etdirməli olduğunu vurğulayıb. “Ermənistanın baş naziri Nikol Paşinyanın hakimiyyətə gəlməsində xaricdəki erməni diasporları, Fransa, xüsusilə də Soros fondunun böyük dəstəyi olub. Məqsədləri də Ermənistanı Rusiyanın nəzarətindən çıxarmaq idi. Ümumiyyətlə, Ermənistan dövlətinin siyasəti hər zaman ikiüzlülük və satqınlıq üzərində qurulub. Paşinyan da bu siyasəti həyata keçirir. Paşinyanın öz müttəfiqi olan Rusiyanın başı üzərindən Avropa İttifaqı və Fransaya üz tutması Rusiyanın Prezidenti və administrasiyası tərəfindən heç də xoş qarşılanmayacaq. Artıq Ermənistan cəmiyyətində də anti-Rusiya meyilli qüvvələr fəallaşıb. Bu, Paşinyan hökuməti tərəfindən də düşünülmüş bir siyasətdir. Paşinyan bilməlidir ki, Rusiya hakim dairələri onun bu xəyanətini bağışlamayacaq. Artıq Rusiyanın siyasi dairələrində, KİV-də Paşinyanın siyasəti sərt tənqid olunur və onun fikirlərini cəfəngiyat adlandırırlar.
Bir məsələni də nəzərə almaq lazımdır ki, bu gün Ermənistan iqtisadiyyatının 70 faizi Rusiyanın əlindədir və Ermənistanın dövlət sərhədlərini rus hərbçiləri qoruyurlar. Ermənistanın Avropa İttifaqı və Fransanın mülki missiyasını öz ərazilərinə dəvət etməsi bu ölkənin aqibətinin yaxşı olmayacağını yəqin etmək anlamına gəlir. Ermənistan bu satqınlıq siyasətinin ağrısını hələ çəkəcək. Ermənistan 1918-ci, eləcə də 1991-ci illərdə müstəqillik əldə etdiyi üçün Rusiyaya minnətdar olmalıdır. Əslində, Ermənistan bu gün dünyada müstəqil dövlət kimi tanınsa da, suveren dövlət deyil. Ermənistanda hakimiyyətdə olan dövlət və hökumət başçılarının heç biri müstəqil siyasət yeritməyə qadir olmayıblar. Ermənistan çox yaxın vaxtlarda bu gün ona himayədarlıq edən dövlətə və beynəlxalq təşkilata da xəyanət edəcək”, – deyə K.Əliyeva bildirib.
Azərbaycan isə müstəqil, suveren bir dövlətdir, beynəlxalq aləmdə böyük nüfuza sahib bir ölkədir. Prezident cənab İlham Əliyev bütün dövlətlərlə balanslaşdırılmış, müstəqil siyasət yürüdən güclü siyasətçi, mahir diplomatdır. Ölkə başçımızın apardığı uğurlu xarici siyasətin nəticəsidir ki, Avropa İttifaqı və bir sıra Avropa dövlətləri Azərbaycanı özlərinə müttəfiq və etibarlı dost dövlət hesab edirlər. Bu yüksək etimad və hörmət ölkə başçımız cənab İlham Əliyevin güclü siyasətçi olması və müstəqil, qətiyyətli xarici siyasət yeritməsindən irəli gəlir. Azərbaycanın Şimal-Cənub, Şərq-Qərb marşrut xətlərinin mərkəzində yerləşməsi, eyni zamanda, Azərbaycanın öz ərazisində yaratmış olduğu müasir nəqliyyat infrastrukturunu Avropa çox yüksək qiymətləndirir və önəm verir.
Azərbaycan və Avropa arasında əlaqələrin getdikcə dərinləşməsindən, ölkəmizin Avropanın enerji təhlükəsizliyinə böyük dəstəyindən danışan deputat Azərbaycanla Ermənistan arasında sülh müqaviləsinin imzalanmasında Avropa İttifaqının təşəbbüslərini yüksək qiymətləndirib: “Avropa İttifaqı Şurasının Prezidenti Şarl Mişelin iştirakı ilə bir neçə dəfə keçirilən üçtərəfli görüş, eləcə də oktyabrın 6-da Fransa Prezidenti Makronun iştirakı ilə baş tutan dördtərəfli görüş sülh prosesinin yaxınlaşmasına ümidi artırır. Azərbaycan və Ermənistan xarici işlər nazirlərinin mütəmadi görüşlərinin keçirilməsi, həmçinin hər iki dövlət tərəfindən yaradılmış müvafiq komissiyalar tərəfindən sülh mətninin hazırlanması gündəmdə duran vəzifələrdəndir”.
Ermənistanın 30 ilə yaxın Azərbaycana qarşı bir çox hərbi cinayətlər törətdiyini qeyd edən K.Əliyeva bu ölkənin hərbi cinayətlərini bu gün də davam etdirdiyini diqqətə çatdırıb: “İkinci Qarabağ müharibəsindən sonra ermənilər ərazilərə 1400-dən çox mina basdırıblar. Mina partlayışları nəticəsində 250 Azərbaycan vətəndaşı ya həlak olub, ya da ağır yaralanıb.
Bu gün bir qrup erməni silahlı dəstələri hələ də Qarabağdan çıxarılmayıb. Prezident İlham Əliyev Avropa İttifaqı Şurasının Prezidentinə və Fransa Prezidentinə Ermənistanın üzərinə götürdüyü bu öhdəliyi yerinə yetirmədiyini bildirdi. Ölkəmizin başçısı Praqa görüşlərində bir daha dünya ictimaiyyətinin və görüş iştirakçılarının diqqətinə Qarabağda yaşayan ermənilərin Azərbaycan vətəndaşları olduğunu və hüquqlarının qorunacağını diqqətə çatdırdı”.
Deputat bildirib ki, dövlətimizin başçısı Ermənistan rəhbərliyini bir daha 10 noyabr 2020-ci il tarixli Bəyanatının bəndlərinə uyğun olaraq Azərbaycandan Naxçıvana gedən yolun açılması barədə üzərinə götürdüyü öhdəlikləri yerinə yetirməyə çağırdı.