“Turanın qurulması realdır, çünki bunun artıq idealoji bazası var, bayrağı hazırdır, gerbi hazırlanıb, indi ortaq dil məsələsi müzakirə olunur, ortaq tarixi, yəni orta məktəblərdə eyni formada yazılmış əsl türk tarixi dərsliyi məsələsi gündəmə gəlib. Uzun müddət çoxsaylı tarixi araşdırmalar aparılıb, indi onların hamısı bir-bir üzə çıxır. Bu araşdırmalar bir neçə dildə hazırlanıb, cəmiyyətə təqdim olunur, cəmiyyət maarifləndirilir. Bunu çox gec gördülər, qabağını ala bilən bir qüvvə yoxdur. Ona görə də yaxın iki-üç il ərzində Turanın hərbi bloku da yaradılacaq. Artıq türkdilli dövlətlər özü bir hərbi bloka çevriləcək. Yəni Qırğızıstan da, Qazaxıstan da Kollektiv Təhlükəsizlik Müqaviləsi Təşkilatından çıxıb bura qoşulacaqlar. Mən buna inanıram”.
Bu sözləri Pravda.az-a açıqlamasında politoloq Cümşüd Nuriyev deyib.
O, Turanın qurulmasında Rusiya Prezidenti Vladimir Putinin maraqlı olduğu ilə bağlı səslənən fikirlərə də münasibət bildirib: “Əslində, Putin Turanın qurulmasında o qədər maraqlı deyil. Bilirsiniz ki, dünyada multipolyar təhlükəsizlik sistemi formalaşıb. ABŞ isə deyir ki, bu sistem unipolyar, yəni birqütblü olsun. ABŞ Rusiya-Ukrayna qarşıdurmasından yararlandı, Avropa İttifaqına Rusiyanı bir qədər təhlükəsizləşdirib. Çini də oyundan çıxarmaq istəyir. Yeni yaradılacaq Turan həm Türk, həm də İslam dünyasının aparıcı lider dövləti kimi bilavasitə dünya düzənini formalaşdıracaq bir qütb olacaq. Rusiya özü də Ukrayna ilə müharibədə gördü ki, Ukraynada qırılanların əsas 60-70%-inin hamısı türk, müsəlman kökənlilərdir, yəni xristianlar döyüşmədi. Ona görə də Turanın qurulmasında Putinin maraqlı olması məsələsini gündəmə gətirirlər. Deməzdim ki, Putin Turanın yaranmasında maraqlıdır, amma əleyhinə də deyil. Çünki öz ərazisindəki 20% müsəlmanın hamısı türkdür. Onlar türklərin olmasını buna görə istəyirlər ki, Turan yarananda Rusiyanı Çin bəlasından qurtarmaq var. Turanın qurulmasında maraqlı olmayan yeganə dövlət ABŞ və İrandır. Bu, birmənalıdır. ABŞ istəmir ki, meydana yeni oyunçu çıxsın. Buna görə də Türkiyənin əleyhinə Yunanıstan kartından istifadə edirlər. Hələ ki bu kartdan yararlanırlar”.
Politoloq deyib ki, Turanın yaradılmasına daha çox Rəcəb Tayyip Ərdoğan başda olmaqla, Türkiyə maraqlıdır: “Çünki uzun müddətdir bu işi qurublar, çoxsaylı filmlər çəkib, ssenarilər yazıblar, tarixi araşdırmalar aparıblar. Türkiyə ərazilərinə hardan gəlib çıxdıqları ilə bağlı məsələlərin hamısı gün işığına çıxıb. Yeni dünya düzənində yaradılacaq Turanın öz güclü mövqeyi var. Bundan narahat olan qüvvələr də az deyil. Bu, anlaşılandır. Turanın yaradılmasına 2009-cu ildə Naxçıvanda start verildi. Oktyabr ayında orada Türkdilli Dövlətlərin Əməkdaşlıq Şurası yarandı. Ötən ilin noyabrında Şura İstanbul Sammitində Türk Dövlətləri Təşkilatı adlandırıldı. Türk dövlətlərinin birgə parlamenti, akademiyası yaradılıb. TÜRKSOY vasitəsilə mədəni əlaqələr quruldu. Latın qrafikasına keçid məsələsi yavaş-yavaş baş tutur. Turan bir gündə qurulan şey deyil. Keçmiş dövrlər deyil ki, gedib işğal edib elan edəsən. İndi bu, alınmır. Turanın yaradılması ilə bağlı siyasi, iqtisadi, mədəni, idealoji informasiya müharibəsi aparılır, hərbi ən sondadır. Bu işi çox uğurla aparırlar. Əsas da təşkilatın liderləri. Tək Ərdoğan yox, cənab İlham Əliyev də bu işdə Ərdoğan qədər iş görüb, həm də məsuliyyəti, səlahiyyəti var. Bu, duet Turanı yaradan insanlardır”.
