DSX: “Azərbaycan ərazisindən İrana qarşı kəşfiyyat məqsədilə istifadə olunması barədə iddialar yalandır”
Oktyabrın 11-də Xəzər dənizinin Azərbaycana məxsus sektorunda Hərbi Dəniz Qüvvələrinin (HDQ) komanda-qərargah təlimi başlayıb. Bu barədə Müdafiə Nazirliyi məlumat yayıb. Məlumatda bildirilir ki, hərbi gəmilərin və dəniz xüsusi təyinatlılarının iştirakı ilə keçirilən təlimdə Xəzər dənizinin Azərbaycana məxsus sektorunda enerji infrastrukturlarının mühafizə və müdafiəsi üzrə tapşırıqlar icra olunub. Komanda-qərargah təliminin oktyabrın 13-dək davam edəcəyi bildirilir.
Bu arada İran İslam Respublikasının (İİR) Nizam İntizam Qüvvələrinin Sərhəd Qoşunlarının komandanı general-mayor Əli Qüdərzi ölkəmizi hədəf alan açıqlama ilə çıxış edib.
Azərbaycan Dövlət Sərhəd Xidmətinin yaydığı açıqlamada isə bildirilir ki, İran kütləvi informasiya vasitələrində dərc edilən müsahibəsində Əli Qüdərzi tərəfindən verilən açıqlamalar həqiqətə uyğun deyil.
Dövlət Sərhəd Xidməti rəsmi olaraq bildirir ki, Azərbaycan Respublikasının dövlət sərhədində hər hansı üçüncü dövlətin qüvvələri heç vaxt olmayıb, hazırda da yoxdur və bundan sonra da olmayacaq.
DSX-nın Mətbuat Mərkəzinin yaydığı məlumatda qeyd edilir ki, Azərbaycan Respublikası ərazisində xaricdən gəlmiş təqfirçilərin fəaliyyət göstərməsi, eləcə də üçüncü ölkələr tərəfindən Azərbaycan ərazisindən İrana qarşı kəşfiyyat məqsədilə istifadə olunması barədə iddialar yalandır və həqiqəti əks etdirmir: “Azərbaycan Respublikasının dövlət sərhədlərində, sərhəd mühafizə qurumlarında hər hansı xarici dövlətin qüvvələri, mütəxəssisləri mövcud deyildir, Azərbaycan Respublikasının dövlət sərhədlərinin etibarlı müdafiəsi və mühafizəsi üçün ən müasir imkanlara malik olan Dövlət Sərhəd Xidmətinin xarici qüvvələrin dəstəyinə ehtiyacı yoxdur. Ermənistanla dövlət sərhədində Görus-Qafan yolunun Azərbaycan Respublikası ərazisindən keçən hissəsində sərhəd və gömrük nəzarətinin tətbiq olunması Azərbaycan Respublikasının suveren hüququdur. Azərbaycan və İran sərhədçiləri arasında mütəmadi olaraq müxtəlif səviyyələrdə işçi görüşlərin keçirilməsinə və məlumat mübadiləsinin aparılmasına baxmayaraq bu günədək Azərbaycan tərəfinə müsahibədə səsləndirilənlər haqqında, ümumiyyətlə, heç bir məlumat verilməyib, hər hansı fakt təqdim olunmayıb. Hazırda İran İslam Respublikası ilə dövlət sərhədində əməliyyat şəraiti stabildir və Azərbaycan sərhəd mühafizə orqanlarının tam nəzarəti altındadır. Dövlət sərhədində Azərbaycan Respublikasının dövlət maraqlarına qarşı yönələn istənilən təxribatın qarşısı bundan sonra da qətiyyətlə alınacaqdır. Qeyd edilənləri nəzərə alaraq, İran rəsmilərinə daha məsuliyyətli olmağı tövsiyə edir, onları yalan və böhtan xarakterli məlumatları yaymaqdan çəkinməyə çağırırıq”.
Kimsəyə sirr deyil ki, Xəzərdə ABŞ-ın, Böyük Britaniyanın böyük maraqları və yatırımları var. Bu baxımdan İranın Azərbaycanı hədələməsi həm də qeyd olunan dövlətlərin hədələnməsi anlamına gəlir. Belə bir vəziyyətdə ölkəmizin Xəzərdə mövqeyi necədir? Enerji infrastrukturlarının mühafizə və müdafiəsi necə icra olunur? İranın təxribatı ola bilərmi?
“Atlas” Araşdırmalar Mərkəzinin rəhbəri Elxan Şahinoğlu deyib ki, 5 Xəzəryanı ölkə su hövzəsində müxtəlif istiqamətlərdə fəaliyyətlərini davam etdirirlər. Hər bir Xəzəryanı dövlətin böyük və ya kiçik Hərbi Dəniz Qüvvələri var. Bu dövlətlərin içində daha çox güclü Hərbi Dəniz Qüvvələrinin olmasına ehtiyacı olan dövlət Azərbaycandır: “Çünki Xəzərdə ən böyük enerji yataqlarına Azərbaycan malikdir. Bu baxımdan enerji yataqlarının təhlükəsizliyi məsələsi Azərbaycan üçün çox vacibdir”.
Elxan Şahinoğlu: “Sərəncam sosial sahədə atılan inqilabi Sərəncamdır”
“Azərbaycana qarşı bütün bu hədələr bir istiqamətdən – İrandan gəlir”
Politoloq deyir ki, Azərbaycanın güclü Hərbi Dəniz Qüvvələri digər dövlətlərə qarşı yönəlmir: “Belə bir donanmaya sahib olmaq təhlükəsizlik tədbirlərindən irəli gəlir. İran zaman-zaman Azərbaycanı Xəzərdəki enerji mənbələri ilə bağlı hədələyib. Hətta Azərbaycanın Xəzərdəki platformalarından birinin ətrafına hərbi katerləri də göndərib yatağın mübahisəli olmasını da iddia etmişdilər. Bugünlərdə isə belə bir açıqlama verdilər ki, guya Azərbaycan Türkiyəyə imkan yaradır ki, Xəzərdə hərbi varlığını gerçəkləşdirsin. Halbuki söhbət Azərbaycanın Hərbi Dəniz Qüvvələrinin gücləndirilməsindən gedirdi. Türkiyə Xəzərdə hərbi baza formalaşdırmır. Azərbaycana qarşı bütün bu hədələr bir istiqamətdən – İrandan gəlir. Digər Xəzəryanı dövlətlərin, heç Rusiyanın da Azərbaycanın Xəzərdəki Hərbi Dəniz Qüvvələrini gücləndirməsinə etirazı yoxdur. ”Türkiyə Azərbaycanın Hərbi Dəniz Qüvvələrini modernləşdirir, gücləndirir” tipində Rusiyadan hər hansı bir xəbər də olmadı. Amma İran özünü qabağa verir, Azərbaycanın Xəzərin statusu ilə bağlı konvensiyanı pozduğunu iddia edir. Bu da əsassız iddialardır. Azərbaycan bu ilin sentyabrında Türkiyə ilə ikitərəfli, sonra isə Pakistanla “Üç qardaş – 2021″ adlı hərbi təlim keçirib. Bu ərəfədə isə Bakıda hər 3 ölkənin parlament sədrlərinin və nümayəndə heyətlərinin ilk üçtərəfli iclasında ”Bakı Bəyannaməsi” adlı sənəd imzalanıb. Sənəddə Azərbaycan, Türkiyə və Pakistan “xaricdən dəstəklənən terror hücumları, kiber hücumlar, dezinformasiya kampaniyalarına qarşı, eləcə də bir neçə digər sahələr üzrə əməkdaşlığı genişləndirməyə” razılaşıblar. Azərbaycanın İkinci Qarabağ müharibəsindən qalib kimi çıxması, beynəlxalq aləmdə yerini möhkəmlətməsi, Türkiyə ilə strateji müttəfiqliyi, Pakistanla əlaqələrin sıxlaşması, İsraillə, Böyük Britaniya ilə strateji münasibətlər qurması – bütün bunlar İranı narahat edir. Güc göstərişinin, hədələmələrin arxasında da bu amil dayanır”.
Politoloqun sözlərinə görə, Azərbaycan hədələrə baxmayaraq Hərbi Dəniz Qüvvələrini modernləşdirəcək: “Bizimlə düşmənçilik edən Ermənistandır, amma Azərbaycanla yaxşı münasibətlərə həvəs göstərməyən digər mərkəzlər də var. İstənilən halda Azərbaycan quru qüvvələri ilə yanaşı Hərbi Dəniz Qüvvələrini də gücləndirməlidir. Yeni, müasir hərbi texnikalar alınmalı, təlimlərin sayı artırılmalıdır. Bu, Azərbaycanın haqqıdır”.“Yeni Müsavat”
