“Hamıya məlum olduğu kimi ölkə başçısı, cənab Prezident İlham Əliyevin rəhbərliyi altında işğaldan azad olunmuş Qarabağ və Şərqi Zəngəzur iqtisadi rayonlarında bərpa və yenidənqurma işləri uğurla davam edir. 30 il işğala, vandalizmə və barbarlığa məruz qalmış tarixi torpaqlarımıza Azərbaycan dövlətinin gücü və qüdrəti sayəsində artıq, həyat yenidən qayıdır. Tarixi torpaqlarımızın yenidən canlandıırılması və burada baş verən barbarlığın dünyaya göstərilməsi baxımından burada beynəlxalq tədbirlərin keçirilməsi xüsusi əhəmiyyət kəsb edir. Belə tədbirlərdən biri də oktyabr ayının 5-də Ağdamda Azərbaycan Milli Şəhərsalma Forumunun açılış mərasimininin keçirilməsidir. BMT-nin Məskunlaşma Proqramı (UN-HABITAT) və Dövlət Şəhərsalma və Arxitektura Komitəsinin birgə əməkdaşlığı, ADA Universitetinin təşkilati dəstəyi ilə Ağdamda “Dayanıqlı İnkişaf Məqsədləri” və “Yeni Şəhər Gündəliyi” – postmünaqişə dövründə bərpa və yenidənqurmanın aparıcı qüvvəsi kimi” mövzusunda Azərbaycan Milli Şəhərsalma Forumunun işğaldan azad olunmuş Ağdam rayonunda təşkil olunması burada barbar ermənilər tərəfindən törədilmiş vandallığın dünyaya nümayiş olunması baxımında olduqca mühüm əhəmiyyət kəsb edir”.
Bu fikirləri Moderator.az-a açıqlamasında Milli Məclisin üzvü Tamam Cəfərova deyib.
Deputat açıqlamasında bildirib ki, işğaldan azad edilmiş ərazilərə gələn hər kəs Ermənistanın işğalı və təcavüzünün nəticələrini görür. İkinci Qarabağ müharibəsi başa çatandan bəri minlərlə əcnəbi qonaq, jurnalist, siyasətçi, vətəndaş cəmiyyəti nümayəndələri azad olunmuş ərazilərə gələrək bunu öz gözləri ilə görüblər. Erməni barbarlığı və vandalizminin miqyası faktiki olaraq o qədər böyükdür ki, Azərbaycanın bu hissəsinə gələn bir çox insanlar özlərini mənəvi cəhətdən tamamilə tükənmiş hiss edirlər. Ərazilər işğaldan azad edildikdən sonra xarici ekspertlər, jurnalistlər buraya gəldilər və Ağdama bir neçə ad verdilər. Bu adlardan biri “urbisid qurbanı” idi, bu da tamamilə doğru idi. Digər ad “ruhlar şəhəri” idi, bu da tamamilə doğrudur. Biri də “Qafqazın Xirosiması” idi.
İşğalçılıq siyasəti yürütməklə Ermənistanın əsas hədəfi de-fakto vəziyyəti yerində dəyişmək və bununla Azərbaycanla danışıqlar prosesini sonsuz etmək idi deyən millət vəkili Tamam Cəfərova qeyd edib ki, məhz buna görə danışıqlar heç bir nəticə olmadan 28 il davam etdi. BMT, ATƏT kimi aparıcı beynəlxalq təşkilatların və digərlərinin Ermənistan qoşunlarının Azərbaycan ərazilərindən dərhal və qeyd-şərtsiz çıxarılmasını tələb edən qətnamə və qərarlar qəbul etməsinə, xüsusilə BMT Təhlükəsizlik Şurasının 30 il ərzində kağız üzərində qalan 4 qətnaməsinə və Ermənistana sanksiyalar tətbiq etməklə bağlı bütün müraciətlərə baxmayaraq rəsmi İrəvan öz işğalçı siyasətindən əl çəkmədi.
Fikirlərinin davamı olaraq Tamam Cəfərova vurğulayıb ki, təəssüf ki, beynəlxalq ictimaiyyət Azərbaycan xalqının humanitar fəlakətinə göz yummağa qərar verdi. Ən çox təəssüf doğuran odur ki, ATƏT-dən mandatı olan Minsk Qrupu adlandırılan struktur və onun həmsədrləri işğal olunmuş ərazilərə dəfələrlə səfərlər edib, bütün şəhər və kəndlərin qəddarcasına dağıdılmasının, ermənilərin torpaqlarımızda qanunsuz məskunlaşdırılmasının şahidi olublar, lakin Ermənistanı qınamayıblar. Əlbəttə, burada məqsəd aydındır. Ermənistanın beynəlxalq hüququn norma və prinsiplərini pozmasına göz yumaraq, status-kvonu saxlamaq. Şübhəsiz ki, Azərbaycan bununla heç zaman barışa bilməzdi.
44 günlük Vətən müharibəsində ölkəmizin qazandığı şanlı qələbə bütövlükdə regionun gələcək inkişafı üçün yeni perspektivlər və yeni reallıqlar yaratmış oldu.
Artıq bütün dünya qəbul edir ki, Azərbaycan regionun lider dövləti və şərtləri diqtə edən tərəfdir. Bu baxımdan deməliyik ki, hər hansı vasitəçiliyə artıq ehtiyac yoxdur. 10 min kvadratkilometrdən çox ərazinin Ermənistan tərəfindən dağıdılmasına baxmayaraq, insanlarımızın çəkdiyi zülmlərə baxmayaraq, Azərbaycan Ermənistana sülh təklif edib. Azərbaycan sülh müqaviləsi üçün əsas olan beynəlxalq hüququn beş əsas prinsipini irəli sürdü: ölkələrin ərazi bütövlüyünün qarşılıqlı tanınması, gələcəkdə ərazi iddialarından çəkinmək, güc tətbiq etməmək və ya güc tətbiq etmək hədəsindən çəkinmək, dövlət sərhədlərinin müəyyən edilməsi və kommunikasiyaların açılması şərtlərini irəli sürmüşdür.
Dünən Praqada Azərbaycan Prezidenti cənab İlham Əliyevin Avropa İttifaqı Şurasının Prezidenti, Fransa Prezidenti və Ermənistanın baş naziri ilə görüşləri və əldə olunan nəticələr onu deməyə əsas verir ki, bütün beş şərt qəbul edilir, Qafqazda sülhə yaxınlaşmaq artıq reallaşır. Avropa İttifaqı Azərbaycan və Ermənistan arasında dayanıqlı sülhün əldə olunmasında olduqca fəal iştirak edir. Brüsseldə bir neçə dəfə üçtərəfli görüş keçirilmişdir və hər dəfə sülhə daha da yaxınlaşılmışdır. Cari dördtərəfli görüş Şarl Mişel və Emmanuel Makron tərəfindən təşkil edilmişdir və bu görüş zamanı da önəmli məsələlər müzakirə olunub. Praqada baş tutan dördtərəfli görüşdə əldə olunan mühüm nəticələrdən biri hər iki ölkənin bir-birinin ərazi bütövlüyünü və suverenliyini tanımasıdır. Əlbəttə, bu, regionda davamlı sülhə nail olunması üçün atılmış mühüm addımdır. Millət vəkili Tamam Cəfərova belə deyib.
