“Ağalı kənd sakininin möhtərəm cənab Prezident İlham Əliyevə “Seçki komissiyasının sədri Məzahir Pənahova deyin, kağız-kuğuzu korlamasın, bizim Prezidentimiz həmişəlik seçilib” deməsi qürurvericidir. Vətəndaş nə istəyir? Seçicinin seçdiyi lider, dövlətinin başçısı onun istəyini gerçəkləşdirirsə, o da təmannasız öz sevgisini, səmimi arzularını bildirirsə, burda nə var ki? Adını “müxalifət” qoyub, vətəndaşın dediklərini başqa cür, xainliklə yozanlar müxalifət deyillər. Onlar xain insanlardırlar, nə Azərbaycan dövlətinin, nə də xalqının nailiyyətini, uğurunu istəyə bilərlər. Bu insanlar yalnız hər şeyin üstünə qara boya yaxmağı, çamur atmağı bilirlər”.
Bu sözləri Pravda.az-a açıqlamasında Milli Məclisin deputatı Məlahət İbrahimqızı deyib.
“O sözü deyən vətəndaş Zəngilanda, işğaldan azad olunmuş bir kənddə məskunlaşıb. Heç bir vəzifəsi yoxdur, səmimi, sadə, təmiz insandır. Öz sevgisini Prezidentinə ifadə edir. İnsan bir Allaha yalvarır, Ondan istəyir, bir də öz rəhbərindən. Bəs kimdən istəməlidir? Xahişini, arzusunu kimə bildirməlidir? Bu insanlar erməni zülmünə məruz qalaraq 30 il Qarabağdan, eləcə də Qərbi Azərbaycandan, yurd-yuvalarından, isti ocaqlarından didərgin düşüblər. Gözləri yolda qalmışdı. Heç biri təsəvvürünə gətirə bilmirdi ki, həmin torpaqlar işğaldan azad olunacaq, gedib el-obalarında yenidən məskunlaşacaq, yurd-yuvalarını, yaxınlarının məzarlıqlarını tapacaq, dədə-babalarının uyuduğu torpaqları ziyarət edəcəklər. Ən müasir standartlara cavab verən kəndlərdə yaşamaq nəinki onların, heç bizim də ağlımıza gəlməzdi, bunu yalnız xəyallarımızda, dualarımızda səsləndirirdik. Dünən möhtərəm Prezidentimiz Birinci vitse-prezidentimizlə Zəngilana səfər edib. Sakinlər də öz sevgilərini, minnətdarlıqlarını cənab Prezidentə bildiriblər. Bundan gözəl nə var?!”, – M.İbrahimqızı deyib.
Deputat bildirib ki, tənqid edənlər, sağlam düşüncəli müxalifət olsaydılar, bu cür düşünməzdilər: “Gözləri götürmür. Hər şeyin bir əndazəsi, çərçivəsi var. Möhtərəm Prezidentimiz Birinci vitse-prezidentimizlə birlikdə Ağalı sakinləri ilə o qədər mehriban, səmimi söhbətlər edirdi ki. Sevincimizin həddi-hüdudu yoxdur. Biz nə arzulayırdıq bəs? Torpaqlarımızın azad olmasını, yuvasından didərgin düşən soydaşlarımızın öz torpaqlarında məskunlaşmasını. İndi buna da çamur atırlarsa, deməli, belələri Azərbaycanın düşmənlərindən geri qalmırlar, daimi olaraq xaricdən, ermənipərəst qüvvələrdən, erməni lobbisindən qaynaqlanırlar. Ermənilər necə düşünürlərsə, bu insanlar da elədirlər. Sadə sakinin dediyi fikirləri hansısa nazir, deputat, vəzifəli şəxs desəydi, öz sevgisini ifadə etsəydi, adam bu tənqidləri anlayardı ki, vəzifə adamlarıdırlar, ona görə tənqid edirlər. Deputat, yaxud hansısa məmur dövlət başçısına öz sevgisini, minnətdarlığını bildirə bilməzmi? Niyə bildirmir? Onlar da insan deyillərmi? Ağalıdakı sakinlər sadə insanlardırlar, cənab Prezidentimizin onları ziyarət etməsi, sözsüz ki, onlar üçün sonsuz sevincdir. Mən də olsam, sonsuz sevinc yaşayaram”.
M.İbrahimqızı əlavə edib: “Xalq artıq gələcəkdə də öz əvəzedilməz liderini daim prezident görmək istəyir. Bunlar da məhz buna xainlik edirlər. Bəli, əlbəttə, 2025-ci ildə növbəti prezident seçkilərində xalq birmənalı olaraq Müzəffər Ali Baş Komandanımızın namizədliyini irəli sürəcək. Cənab Prezidentimiz təkcə Yeni Azərbaycan Partiyasının lideri ola bilməz ki. Möhtərəm Prezidentimiz onsuz da həmişə xalqın mütləq əksəriyyətinin səsini, dəstəyini qazanıb. Qarşıdakı seçkidə xain, erməni zehniyyətli insanlardan başqa bütün xalqımız, təbii ki, cənab Prezidentimizə səs verəcək. Öz liderinə etimadı, hörməti, sevgisi olan xalq yenidən seçki keçirilməsini, əlbəttə, artıq bir şey hesab edir. 2025-ci ildə cənab İlham Əliyevin qarşısına çıxa biləcək namizədin olması mümkündürmü? Qətiyyən mümkün deyil. Kim özündə cəsarət toplaya, risk edə bilər ki, desin “mən də 2025-ci ildə namizədliyimi irəli sürürəm”. Kimsə özünü seçkidə sınamaq istəyirsə, buyursun, söhbət bundan getmir. Amma möhtərəm Prezidentimizlə rəqabətə girə biləcək alternativ namizəd, düşünürəm, on illiklər boyu olmayacaq. Sonrasını deyə bilmərəm”.
Deputat deyib ki, seçki ağır prosesdir: “Bir neçə ay bütün xalq, ictimaiyyət seçkiyə cəlb olunur, öncədən hazırlıq işləri gedir, dövlət nə qədər maliyyə ayırır və s. Möhtərəm İlham Əliyev əbədiyyən Prezindentimiz olmağa layiqdir. Belə bir təcrübə Azərbaycanda ilk deyil. Məsələn, İkinci Dünya müharibəsindən sonra Ruzvelt dünyaya demokratiya dərsi keçən ABŞ-da üç dəfə prezident seçildi, dördüncü dəfədə artıq o, dünyasını dəyişdi. Qurtuluş savaşından sonra Türkiyə parlamentində qərar qəbul edildi ki, dahi Atatürk nə qədər sağdır, Türkiyə Cümhuriyyətinin rəhbəri olsun. Düzdür, zəfər qazandıq, düşmənlərimiz rüsvay vəziyyətdə məğlubiyyətə imza atdılar. Amma revanşist qüvvələr yenə də baş qaldırıblar. Nəinki Ermənistandakı qüvvələr. Paşinyana, sanki güc gəlib, elə bil müharibədə ona-buna yalvaran, “dabanyalayan” deyildi. Makron kimi Azərbaycana düşmən mövqedə yanaşan tanınmış ölkələrin dövlət başçıları belə revanşist danışanda, əlbəttə, Paşinyan da ruhlanır. Təkcə Ermənistan yox, digər qonşularımızda da Azərbaycanın uğurlarını gözü götürməyən qüvvələr var. Düşünürəm, sakitlik, təhlükəsizlik, dayanıqlı inkişaf, sülh sazişinin imzalanması, bütün bu məsələlər həllini tapmayınca prezident seçkilərinin keçirilməsi düzgün deyil. Biz bu gün yarı hərbi vəziyyətdəyik. Hər dəqiqə erməni diversantları hərbi təxribat törətmək istəyirlər. Belə bir məqamda seçki keçirilməsi nə qədər düzgündür? Azərbaycan xalqı öz taleyini Heydər Əliyev siyasətinə, İlham Əliyevə bağlayıb. Vəssalam, bitdi! Xainlər nə istəyirlərsə, desinlər, ürək bulandırsınlar”.
