Dövlətlərarası ikitərəfli əlaqələr qarşılıqlı etimada, qarşılıqlı inama söykənir. Bu etimad, bu inam dövlətlərarası münasibətlərin daha da möhkəmlənməsində başlıca vasitələrdən biri olur. Azərbaycanla Gürcüstan tarixən mehriban qonşuluq şəraitində yaşayıb. İmperiya dağılandan, Azərbaycan dövlət müstəqilliyini bərpa etdikdən sonra onu tanıyan ilk dövlətlərdən biri də Gürcüstan olub.
Azərbaycanla Gürcüstan arasında istər siyasi, istər iqtisadi, istərsə də mədəni əlaqələr möhkəm, davamlı, dönməz sülhün nəticəsidir.
Oktyabrın 24-də Azərbaycan Respublikasının Prezidenti cənab İlham Əliyevin Gürcüstana rəsmi səfərində Gürcüstanın Mçxeta rayonundakı Muxrani sarayında “Qarabağ xanlığının irsi” sərgisində “Qarabağ xanlığı. Tarixi və mədəni kimlik” kitabı təqdim edilib. İstər kitab, istərsə də sərgidə nümayiş etdirilən fotolar xalqımızın tarixinin bir dövrünü – xanlıqlar dövrünü əks etdirməklə bir sırada qürurvericidir.
Bir çox icra olunan birgə layihələr təkcə ölkələrimiz üçün deyil, bölgə üçün, bütövlükdə Avropa üçün xüsusi əhəmiyyət daşıdığını bildirən Azərbaycan Respubliksının Prezidenti cənab İlham Əliyev dedi: ”Qarabağ münaqişəsi başa çatandan sonra vaxt gəlib çatıb ki, Azərbaycan və Ermənistan sülh müqaviləsi imzalasınlar. Azərbaycanın niyyəti bundan ibarətdir. Biz beş əsas prinsipdən ibarət təkliflərimizi Ermənistan tərəfinə təqdim etdik. Əgər prinsiplər qəbul olunsa, Cənubi Qafqaza sülh gələcək və eyni zamanda, əməkdaşlıq üçün imkanlar yaranacaqdır. Əgər Ermənistan tərəfi Gürcüstan-Azərbaycan-Ermənistan məsləhətləşmələrinə başlamağa hazırdırsa, ölkəmiz buna hazırdır”. Bu tezis Qafqazda sülhün, əmin-amanlığın təmin edilməsi düsturu kimi qəbuledilməlidir.
Azərbaycan dünya bazarlarına qaz ixracatını artırmaq niyyətindədir. Bu il 22 milyard kubmetr ixracımız olacaq, gələn il daha da artacaq. Bu ilin iyul ayında Avropa Komissiyası ilə Azərbaycan arasında imzalanmış enerji sahəsində strateji tərəfdaşlığa dair Memorandumda göstərilir ki, növbəti 5 ildə Azərbaycan Avropaya qaz ixracını iki dəfə artıracaq. Planlaşdırılır ki, 2027-ci ildə Azərbaycanın təkcə Avropaya qaz ixracatı 20 milyard kubmetrə çatacaq. Eyni zamanda, gələn il Bakı-Tbilisi-Ceyhan neft kəməri xətti ilə ixrac artırılacaq”.
Azərbaycan Respublikasının Prezidenti cənab İlham Əliyev dünyada Xəzər üzərindən Azərbaycan, Gürcüstan və qonşu ölkələrdən keçən nəqliyyat yollarına böyük ehtiyac olduğunu da, yeni nəqliyyat yolları həm geosiyasi vəziyyətlə bağlılığını da nəzərə çatdırdı.
Gürcüstan Respublikasının Baş naziri bəyanatında Azərbaycan Respublikasının Prezidenti cənab İlham Əliyevə xitabən dedi: “Azərbaycanla Gütcüstanın bu qədər yaxın olmasında sizin töhfəniz çox böyükdür. Bizim ölkələrimiz arasında misilsiz dostluq əlaqələri və sıx münasibətlər var. Həmin münasibətlər tarixi əlaqələrimizə və qarşılıqlı hörmətə əsaslanır. Mən əminəm ki, mövcud əməkdaşlığımız ölkələrimizin və xalqlarımızın rifahı naminə daha da yüksək səviyyəyə qalxacaq”.
Azərbaycan Respublikasının Prezidenti cənab İlham Əliyev bəyanatında daha sonra dedi: “Cənab Baş nazirlə bizim görüşlərimiz tez-tez keçirilir. Təkcə keçən il hörmətli cənab Qaribaşvili iki dəfə Azərbaycanda səfərdə olub. Eyni zamanda, beynəlxalq təşkilatların keçirdiyi tədbirlər çərçivəsində də biz daim görüşürük. Əminəm ki, bugünkü səfər Gürcüstan və Azərbaycan arasındakı dostluq və qardaşlıq münasibətlərinə yeni təkan verəcək. Bu münasibətlər çox dərin ənənələr üzərində qurulub. Əsrlər boyu xalqlarımız dostlu, qardaşlıq, mehriban qonşuluq şəraitində yaşamışlar. Dövlətlərarası əlaqələr də bu möhkəm təməl üzərində qurulubdur”.
Azərbaycan Respublikasının Prezidenti cənab İlham Əliyevin Gürcüstana səfəri hər iki dövlət üçün həm siyasi, həm də iqtisadi baxımdan səmərəli olacaq. Mədəni əlaqələrin inkişafı üçün də daha perspektivli imkanlar açılır.
Səbinə Xasayeva,
Milli Məclisin deputatı
