“Ağdamda evimizdə hər zaman divardakı xalçanın üstündə tar aləti asılırdı. Mənim o zaman 5-6 yaşım var idi. Bilmirdim ki, bu alətin adı nədir?! Amma bu musiqi alətinin səsini qonşulardan, ordan-burdan eşidirdim. Atamdan soruşanda dedi ki, bu tar alətidir və əminindir. Dedim ki, niyə burdadır? Dedi ki, əmin müharibədədir. Həbib əmim müharibədən qayıdandan sonra mənə həmin tar alətini hədiyyə etdi. İlk tarımı əmim mənə hədiyyə edib”.
Bunu Moderator.az-a açıqlamasında xalq artisti, görkəmli sənətkar Ramiz Quliyev deyib. O daha sonra əlavə edib.
“İncəsənət çox incə sənət deməkdir. Uzun bir yol gəlmişəm bu günə qədər. Qərb repertuarını ilk dəfə mən tarda ifa etmişəm. Bəzən uğur qazanan insanı göz də götürmür. Bəzi həmkarlarım o vaxt deyirdi ki, “Ramiz rusca ifa edir”. Mən bu söz-söhbətlərə heç vaxt fikir verməmişəm”, – deyə o bildirib.
Xalq artisti tar alətinin böyük bir qüvvəyə malik olduğunu da bildirib.
“1993-cü il idi. Bakı Musiqi Akademiyasının rektoru Fərhad Bədəlbəyli başda olmaqla Ağdama gəlmişdik. Dava-dərman, sovqat da aparmışdıq əsgərlər üçün. Səhnə düzəltmək istəyirdilər, alınmadı. Fərhad müəllim, Rafiq Hüseynov danışandan sonra tarı sinəmə basıb “Çahargah” muğamını ifa etdim. İfam zamanı gülləbaran başlasa da, tarı dayandırmadım. Tarın səsi avtomatın səsini susdurmuşdu. Belə ki, erməni əsgərlər silahı yerə qoyub, tarın səsinə qulaq asırdılar. Erməni polkovnik bizim zabitlərə demişdi ki, o oğlanı tanıyıram, tərsdir, ifası bitməyənə qədər tarı susdurmayacaq. Görün tar aləti nə qədər böyük qüvvəyə malikdir. Çox şükür ki, torpaqlarımızdan indi bütün musiqi alətlərimizin səsi gəlir”, – deyə sənətkar bildirib.
