Bu gün ermənilərin qorxulu röyasına çevrilən “müəllim” ləqəbli şəhid kəşfiyyatçı İmran Məmmədlinin doğum günüdür.
Şəhid Məmmədli İmran Cahangir oğlu 1985-ci il avqustun 9-da Beyləqan rayonunun Birinci Şahsevən kəndində dünyaya gəlmişdir. O, 1991-ci ildə Gəray Əsədov adına Birinci Şahsevən kənd 1 nömrəli tam orta məktəbin 1-ci sinfinə getmişdir. Uşaqlıqdan fiziki hazırlığı ilə seçilən İmran idmanla məşğul idi, elə buna görə də o, 2002-ci ildə 11-ci sinfi bitirərək Azərbaycan Beynəlxalq Universitetinin Bədən Tərbiyəsi və İdman fakultəsinin qiyabi şöbəsinə qəbul olmuşdur. Qəhrəmanımız 2003-cü ilin oktyabrında Beyləqan rayon hərbi komissarlığı tərəfindən həqiqi hərbi xidmətə çağırılmışdır. Daxili Qoşunların Bakı şəhərində yerləşən “N” saylı hərbi hissəsində hərbi xidmətini başa vurduqdan sonra təhsilini davam etdirmişdir.
Lakin 2007-ci ildə yenidən təhsilini yarımçıq saxlayıb sənədlərini Silahlı Qüvvələrin “Müddətdən artıq həqiqi hərbi xidmət hərbi qulluqçularının hazırlığı” kursuna vermişdir. Kursu uğurla bitirərək Füzuli rayonunda düşmənlə üzbəüz mövqedə yerləşən “N” saylı hərbi hissədə motoatıcı manqa komandiri vəzifəsinə təyinat almışdır. İmran nümunəvi xidməti ilə seçilərək 2008-ci ildə “Azərbaycan Respublikası Silahlı Qüvvələrinin 90 illiyi (1918-2008)” yubileyi medalına layiq görülmüşdür. O, daha sonra xidmətini Beyləqan rayonunda davam etdirmişdir.
2010-cu ildən isə Gəray Əsədov adına Birinci Şahsevən kənd 1 nömrəli tam orta məktəbdə “Çağırışaqədərki hazırlıq” fənnini tədris etməyə başlamışdır. O, müəllim kimi fəaliyyət göstərməklə yanaşı, idmanın ən geniş yayılmış növlərindən biri olan taekvondo ilə də məşğul idi. İmran iki dəfə taekvondo üzrə Azərbaycan çempionatında birincilik qazanmış, bir dəfə isə ölkə kubokunda iştirak edərək gümüş medal ilə təltif olunmuşdur. Qəhrəmanımız Azərbaycan Taekvondo Federasiyası tərəfindən Bakı şəhərində təşkil olunmuş kəmər imtahanında taekvondo idman növünün incəliklərini və xüsusiyyətlərini bildiyini sübuta yetirərək qara kəmər dərəcəsinə layiq görülmüşdür.
Müəllim kimi fəaliyyət göstərdiyi illərdə o, gənclərə vətən sevgisi aşılayıb ərazi bütövlüyümüzün təhlükə altında olduğu bir vaxtda nümunəvi şagirdlər yetişdirmişdir. Heç də təsadüfi deyil ki, məktəblilər arasında keçirilən “Cəsurlar”, “Şahin”, “Sərhəd” kimi hərbi-idman oyunlarında onun yetirmələri müvəffəqiyyətlə iştirak edib, lauretlər sırasına düşmüşdülər. Şagirdlərindən hərb sənətinə xüsusi maraq göstərib gələcəkdə bu yolu seçənlər də olmuşdur. Onlardan biri gizir Əzimov Cavanşir Vətən müharibəsində igidlik göstərək, qəhrəmancasına şəhid olmuşdur.
İmran 2013-cü ikinci dəfə hərbiyə qayıtmış, Beyləqan rayonunda yerləşən “N” saylı hərbi hissənin kəşfiyyat taborunda xidmət etmişdir. Kəşfiyyatçı vəzifəsini şərəflə yerinə yetirən qəhrəmanımız düşmənin yerləşdiyi məkan, eləcə də onun hərbi texnikası, qoşun növü, hərbi qüvvələrinin dislokasiyası, silahları barədə ən çevik, dəqiq və operativ məlumatları toplamağı ilə seçilmişdir. Təcrübəli kəşfiyyatçımız bəzən günlərlə düşmənin nəzarətində olan ərazilərdə olub ona verilən döyüş tapşırıqlarını uğurla icra etmişdir. İmranın real müharibə ilə ilk tanışlığı isə 2016-cı ilin aprelində olmuşdur. Düşmən təxribatına cavab olaraq başlayan 4 günlük müharibədə İmranın da təmsil olunduğu kəşfiyyat qrupu düşmənin postlarına daxil olaraq Lələtəpəni fəth etmişdilər. Lələtəpənin işğaldan azad olunmasından sonra o, “Hərbi xidmətdə fərqlənməyə görə” 3-cü dərəcəli medalına layiq görülmüşdür. Qəhrəmanımız 2018-cı ildən “N” saylı hərbi hissənin əlahiddə “Həmlə” taborunda xidmətini davam etdirmişdir. O, xidmət etdiyi illər ərzində qazandığı təcrübəsini və hərbi biliklərini hərbçi yoldaşları ilə bölüşüb, onlarına püxtələşməsinə öz töhfəsini vermişdir. Elə o vaxtdan da hərbçi yoldaşları ona müəllim deyə müraciət edir, “müəllim” həm də onun kəşfiyyatçı kimi ləqəbi olmuşdur. İmran 2018-ci ildə “Azərbaycan Ordusunun 100 illiyi (1918-2018)” medalı ilə təltif edilmişdir.
O, 2020-ci il sentyabrın 27-si səhər saatlarında Ermənistanın atəşkəs rejimini pozub Azərbaycana qarşı hücum etməsi və ordumuzun əks-hücuma keçməsi ilə başlayan Vətən müharibəsində də igidliyi ilə özünü təsdiq etmişdir. Onun xidmət etdiyi “Həmlə” taboru döyüşə Füzuli rayonunun Şükürbəyli kəndi istiqamətindən başlamışdır. Torpaqlarımızın işğaldan azad edilməsində xüsusi fədakarlıqla iştirak edən müəllim, eyni zamanda döyüşçü yoldaşlarına mənəvi-psixoloji cəhətdən dəstək olmuşdur. O, Füzuli, Cəbrayıl və Qubadlı rayonları ərazisində uğurlu döyüşlərin ardından oktyabrın 25-də Füzuli rayonunun Kürdlər kəndində düşmən arxasına keçərək döyüş tapşırığını yerinə yetirərkən düşmən pusqusuna düşmüşdür. Döyüşçü yoldaşları şəhid olan İmran tək başına bir neçə saat düşmənlə döyüşüb, mühasirədən çıxmağa çalışsa da, buna nail olmur. Mənfur düşmənin snayper gülləsinə tuş gələn İmran şəhidlik zirvəsinə ucalmışdır. Onun nəşi qələbədən 16 gün sonra ailəsinə təhvil verilmişdir. İmran noyabrın 26-da Birinci Şahsevən kəndində uğrunda canını fəda etdiyi vətən torpağına tapşırılmışdır.
Qəhrəmanımız həm də ədəbiyyata, sözə, şeirə bağlı biri idi. Onun döyüş vaxtı dediyi Hüseyn Arifin “Gərək” qoşması şəhidimizin ruhuna ithaf olunsun:
Həyatı dərindən duymaqdan ötrü
Min oddan, alovdan keçəsən gərək.
Enişli, yoxuşlu bu yollarda sən,
Yaxşını yamandan seçəsən gərək.
Sevinc də, kədər də səbəbsiz deyil,
Məzəsiz məclis də bir məclis deyil,
Gənclik illərində şərab pis deyil,
Çayı qocalanda içəsən gərək.
Hüseyn, səni də dəyişər zaman,
Yalvarma loğmana üzüləndə can.
Hələ doymasa da gözün dünyadan,
Vaxt tamam olanda köçəsən gərək.
İmran ailəli idi, onun Vüsal və Röyal adlı iki oğlu, Gülsüm və Röya adlı iki qızı var.
Qəhrəmanlığı və şücaəti ilə adını vətən tariximizin şanlı səhifəsinə əbədi yazan çavuş Məmmədli İmran Cahangir oğlu ölümündən sonra iştirak etdiyi döyüş əməliyyatlarında və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə, Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin sərəncamları ilə “Vətən uğrunda”, “Cəbrayılın azad olunmasına görə” və “Füzulinin azad olunmasına görə” medalları ilə təltif edilmişdir.
Ramil Hikmət
