Bu gün ingilis dili öyrənmək istəyən insan mütləq dil kurslarına müraciət etməyə məcbur qalırlar. Baxmayaraq ki, 11 il orta məktəbdə, daha sonra isə ali məktəblərdə bu istiqamətdə təhsil alırlar.
Maraqlıdır, uzunmüddətli tədris alan məzunlar nə üçün ingilis dilində sərbəst danışa bilmirlər?
11 il orta məktəbdə bu dili öyrənən, 4 il isə universitetdə ingilis bölməsində təhsil alan Həmidə İbrahimova Redaktor.az-a bildirdi ki, orta məktəbdə ingilis dili çox keyfiyyətsiz formada tədris olunub.
“Məktəbdə ingilis dili dərsində 2 qrupa ayrılırdıq. Bir qrupa sinif rəhbərimiz, digərinə isə başqa müəllim dərs deyirdi. Sinif rəhbərimiz şagirdlərdən mətnləri öyrənmələrini, ev tapşırıqlarını işləmələrini hər zaman tələb edirdi. Bizim qrupun müəllimində isə bu tələbkarlıq yox idi, buna görə də şagirdlər dərsə məsuliyyətsiz yanaşırdılar”.
Həmidənin sözlərinə görə, ali təhsil aldığı Azərbaycan Dillər Universitetində isə təhsil səviyyəsi orta məktəbə nisbətən yaxşı olsa da, müəllim tələbələr arasında fərq qoyurdu:
“Universitetdə müəllim tələbələr arasında fərq yaradırdı. Məsələn, öndə oturan tələbələrə daha diqqətli, canyandıran idisə, bir az arxa partada əyləşənlərə qarşı tamam fərqli münasibət göstərirdi. Düzdür, hər birimizə yol göstərirdi, oxumalı olduğumuz kitabları da tövsiyə edirdi, amma bu kimi hallar adamı həvəsdən salırdı”.
Mövzu ilə bağlı saytımıza açıqlama verən Milli Məclisin Elm və təhsil komitəsinin üzvü, deputat Ceyhun Məmmədov dedi ki, bu problemin olduqca müxtəlif səbəbləri var. O, hesab edir ki, səbəblərdən biri həm orta məktəblərdə, həm də universitetlərdə ingilis dilinin keyfiyyətli tədris olunmaması ilə bağlıdır:
“Yəni orta məktəblərdə və universitetlərdə bu fənn kifayət qədər keyfiyyətli və yaxşı tədris edilmir. Həmçinin burada dərs vəsaitlərinin – kitabların da rolu var. Bu gün dünyada xarici dili öyrənmək üçün müxtəlif metadologiyalar, vəsaitlər var. Bizdə isə hələ bəzən sovet dövründən, bəzənsə o qədər də müasir üsullarla səslənməyən kitablardan istifadə edirik. Bu da öz təsirini göstərir. Üçüncü məsələ isə ondan ibarətdir ki, dil öyrənmək üçün həm də laboratoriyalar olmalıdır. Bu laboratoriyaların bütün məktəblərdə və universitetlərdə olmaması da bu prosesə birmənalı olaraq öz təsirini göstərir”.
Deputat qeyd etdi ki, ingilis dilinin öyrənilməsində şagird və tələbələr də maraqlı olmalıdırlar.
“Burada digər bir məsələ isə şagird və tələbələr ilə bağlıdır. Onlar bu məsələdə özləri maraqlı olmalıdırlar. Yəni bəzən təhsil alanlar məsələyə o qədər də önəm vermir, ciddiyə almırlar. Bir proqramda olan fənn kimi yanaşırlar və sona qədər öyrənməyə çalışmırlar. Tələbənin özü maraqlı olmalıdır, əlavə kurslara getməlidir, öz üzərində işləməlidir. Bu məsələyə önəm verməliyik. Bu qədər həm orta məktəbdə, həm universitetdə keçirilir, amma nəticə yoxdur. Nəzərə alsaq ki, dünyada müasir texnologiyalar, avadanlıqlar, informasiyalar həm də ingilis dili ilə bağlıdır. Bu səbəblə məsələyə biz daha həssas və diqqətlə yanaşmalıyıq”.
