Onun adı çoxlarına tanış deyil. 1908-ci ildə Bakıda çoxuşaqlı ailədə doğulan polkovnik Rəşid Məcidov iztirablı bir həyat yolu keçib. 15 yaşında Bakı Sənaye və İqtisadiyyat Texnikimuna daxil olan Rəşid Məcidov buranı əla qiymətlərlə başa vurur. 8 nömrəli yetimxanada tərbiyəçi və qabaqcıl pioner idi.
İşgüzarlığı, təşkilatçılığı sayəsində onu Zaqafqaziya komitəsinin katibi seçirlər.
1933-cü ilin noyabrından — Azərbaycan Komsomolunun Mərkəzi Komitəsinin birinci katibi olur. Daha sonra Moskvada Ali Partiya Məktəbində təhsilini davam etdirir.Sonra Qaradağ Rayon Partiyası Komitəsinin birinci katibi, Oktyabr rayon təşkilat komitəsinin birinci katibi və Yayımlama Komitəsinin sədri olur.
Böyük Vətən müharibəsi dövründə o, 416-cı atıcı diviziyasının siyasi şöbəsinin rəhbəri idi. Diviziyanın tərkibində Mozdokdan Berlinə qədər yol keçir. 1945-ci il mayın 2-də Berlinin alınması zamanı, Berlinin Brandenburq qapısı üzərinə Sovet bayrağını əsgərləri ilə birgə sancır.
Müharibədən sonra Gürcüstan SSR-də Vazianidə artilleriya alayı heyətinin başçısı təyin olunub.O, daha sonra Azərbaycan Milli Diviziyasının siyasi şöbəsinin rəhbəri idi. Bakının Oktyabr rayon komitəsinin birinci katibi, Azərbaycan Kommunist Partiyası Mərkəzi Komitəsinin inzibati qurumları şöbəsinin müdiri vəzifəsində çalışmışdır. Azərbaycan SSR Ali Sovetinin III çağırışında deputat seçilib. 1967-ci ildə ermənilər Xankəndində təxribat törətmək istəyirlər. Dövlət Təhlükəsizlik Kömitəsinin polkovniki olan Rəşid Məcidov Ulu öndər Heydər Əliyevin göstərişi ilə Xankəndinə gedir. Rəşid Məcidov bu işlərin başında duran erməni polis polkovnikini iclas zalından qovur və onun işdən azad edilməsinə nail olur.
Leykemiyadan əziyyət çəkən Rəşid Məcidov, 1970-ci ildə vəfat etmişdir. 1970-ci ildə Bakıda yerləşən Fəxri Xiyabanda dəfn edilib. Rəşid Məcidov Mariya İvanova ilə ailə həyatı qurmuş və ömrünün sonuna qədər onunla evli idi.
Bu izdivacdan 3 oğlu olub. Onlardan ikisi Qarabağ müharibəsində iştirak edib.
Böyük oğlu Vladislav xüsusi təyinatlılar qərargahının rəisi, Mikayıl isə Ağdamdakı hərbi sahə xəstəxanasında neyrocərrah kimi xidmət edib.
