44 günlük Vətən müharibəsində Azərbaycanın işğalçı Ermənistan ordusuna qarşı “Bayraktar TB2” pilotsuz uçuş aparatlarından (PUA) istifadə etməsi ilə əlaqədar bir sıra Qərb dövlətləri və Kanada Türkiyəyə embarqo tətbiq etmişdi. Kanadanın “Telemus Sistemleri Inc.” şirkəti Türkiyə istehsalı olan PUA-ları müşahidə kameraları və digər elektron avadanlıqlarla təchiz edib, əsas müştəriləri isə Türk Havaçılıq və Kosmik Sənaye AŞ (TUŞAŞ) olub. 27 sentyabr 2020-ci ildə başlayan və 44 gün davam edən Vətən müharibəsində Azərbaycanı dəstəklədiyinə görə Kanada hökuməti həmin ilin oktyabr ayında Türkiyəyə silah embarqosu tətbiq edərək ixracat icazələrini ləğv edib.
Təbii ki, bunların baş vermə səbəblərindən biri və elə birincisi də Azərbaycan Ordusunun inkişafı və müharibədə qələbəni təmin etməsində idi.
Bu da öz növbəsində Kanada və Qərb ölkələrini narahat edirdi. Həmin ölkələr məlum idi ki, Azərbaycan və Türkiyə arasında hərbi əməkdaşlığın daha da inkişaf etməsinin əleyhinə idilər.
Hərbi ekspert Ramil Məmmədli deyir ki, indi Rusiya-Ukrayna müharibəsində Qərb mətbuatı bu cür yazılar yazmır. 2020-ci ildə Azərbaycanın ərazi bütövlüyü uğrunda apardığı haqq savaşında Qərbin hərbi icmal qurumları bizi pualardan istifadə etdiyimiz üçün günahlandırırdı. İndi isə məlum məsələdə qərb mediası puaları uğur mələyi kimi təqdim edir.
Elə bu günlərdə Almaniyanın aparıcı KİV-i olan “Bild” nəşrində yayımlanan “Ümid silahı” başlıqlı məqalə sosial şəbəkələrdə geniş müzakirələrə səbəb olub. Maraqlıdır, 44 günlük vətən müharibəsində Ermənistan silahlı qüvvələrinin Azərbaycanda törətdiyi müharibə cinayətlərinə göz yuman “Bild” indi Bayraktar PUA-ları haqqında niyə fikrini dəyişdi? Məgər, eyni silah deyil? Bəlkə texniki göstəriciləri fərqlidir. Elə Kanada da bu məsələyə səssiz qalır. Təbii ki, Qərbin bu davranışı və Kanada kimi ölkələrin belə münasibətləri bizim üçün yeni bir şey deyil. Qərbin ikili standartlar siyasəti elə bir Qərb üslubudur.
