image-ads_2000x150
image-7backend

Knyaz Həsənov Xankəndinə niyə getmişdi – Brüssel görüşü ərəfəsi gərginlik

image-ads_728x90

“Ermənistan tərəfdən hər hansı təxribat olacaqsa, Brüssel görüşünün keçirilməsi belə sual altına düşə bilər”
Brüsseldə olacaq 15 dekabr görüşü ərəfəsi İrəvandakı revanşist qüvvələr vəziyyəti yenidən gərginləşdirməyə çalışırlar. Bunun üçün atəşkəsin pozulması və hərbi təxribatlardan istifadə edirlər.

Məlumdur ki, Ermənistan parlamentinin deputatlarının qanunsuz olaraq Xankəndinə səfəri Azərbaycan və Ermənistan xarici işlər nazirlərinin Stokholmdakı görüşünün baş tutmaması ilə nəticələndi. Azərbaycan bu təxribatçı hərəkətə görə görüş qərarından vaz keçdi. Qanunsuz səfər heyətinə erməni deputatlar Sisak Qabrielyan, deputatlar Taqui Kazaryan, Lilit Qalstyan, Asmik Akopyan, Narek Babayan, Elinar Vardanyan, Akop Aslanyan, Knyaz Həsənov və ekspertlər daxildir. Məlumat üçün deyək ki, Knyaz Həsənov Ermənistan parlamentinin hakim “Mənim addımım” fraksiyasından olan yezidi kürd deputatdır. O, çıxışlarında həmişə bildirib ki, erməni və kürd xalqlarının ortaq düşməni Türkiyədir. İndi onun da Xankəndində peyda olması təəccüblü deyil.

Bəs Brüssel görüşü ərəfəsi gərginlik Paşinyan hökumətinin və ya revanşist qüvvələrin nəyinə gərəkdir? Xankəndinə qanunsuz səfərdə məqsəd nədir? Nəhayət, bu səfərə görə Rusiya sülhməramlılarının məsuliyyəti nədir, onların qanunsuz səfərinin qarşısını almaq olardımı?

Politoloq İlyas Hüseynov “Yeni Müsavat”a bildirdi ki, bir həftə sonra Brüsseldə Azərbaycan və Ermənistan liderlərinin görüşünün keçirilməsi nəzərdə tutulub. Lakin bu görüş keçirilməyə də bilər: “Bir neçə gün öncə Ermənistanın təxribatına cavab olaraq Azərbaycan xarici işlər naziri Ermənistan xarici işlər naziri ilə görüşdən imtina etdi. Yəni artıq Ermənistanın təxribatlarına Azərbaycan tərəfi bu cür də cavab vermək təcrübəsinə malik oldu. Bu isə o deməkdir ki, Ermənistanın yeni təxribatları olacaqsa, həmin təxribat növbəti görüşlərə də öz təsirini göstərə bilər. Xarici işlər nazirlərinin görüşü ərəfəsində Rusiya sülhməramlılarının nəzarət etdiyi bölgəyə Ermənistan parlamentinin bir qrup üzvü səfər edirsə, belə bir vəziyyətdə Azərbaycanla Ermənistan arasında diplomatik-siyasi müstəvidə görüşlərin heç bir əhəmiyyəti qalmır. Stokholmda nazirlərin görüşünün baş tutmamasının əsas səbəbkarı Ermənistanın təxribatı oldu. Azərbaycan bu təxribata nazirlərin görüşündən imtina etməklə cavab verdi, bununla öz siyasi iradəsini göstərdi, eyni zamanda ATƏT-in Minsk Qrupuna nümayiş etdirdi ki, görüşlər nəticəyönümlü substantiv mahiyyət daşımalıdır. Dediyim odur ki, artıq yaşanan bu hadisə Brüssel görüşünün də baş tutmasının hər an sual altına düşə biləcəyi ehtimalını gücləndirir”. Ekspert daha bir detalın nəzərə alınmasının vacibliyini dedi: “Nəzərə alaq ki, bu görüş Rusiyanın vasitəçiliyindən kənarda Avropa İttifaqı meydançasında keçiriləcək və Brüssel Avropanın siyasi paytaxtı sayılır. Brüssel görüşü öncəsi Azərbaycan tərəfinə minalanmış ərazilərin xəritələrinin verilməsi onu göstərdi ki, Rusiya tərəfi Avropa İttifaqı meydançasında keçiriləcək görüşün əhəmiyyətini bir qədər də azaltdı. Avropa İttifaqının təşkil etdiyi görüş humanitar məqsədli qərarın-əsirlərin qarşılığında mina xəritələrinin verilməsi barədə qərarın qəbulu ilə nəticələnəcəkdisə, artıq Brüsselin əlindən bu da alınmış oldu. Nəzərə alın ki, xarici işlər nazirlərinin də görüşü Avropa İttifaqına üzv dövlətin paytaxtında keçiriləcəkdir və Ermənistanın təxribatı bu görüşün reallaşmasına imkan vermədi.

Putinin 15 dekabrda keçiriləməsi planlaşdırılan görüş barədə Şarl Mişellə danışdığını bəyan etməsi onu göstərdi ki, Rusiya tərəfi Brüssel görüşünü ciddi nəzarətdə saxlayır, bu görüş Kremlin diqqət mərkəzindədir. Ermənistanda isə revanşist qüvvələr Brüssel görüşü öncəsi bu görüşü sabotaj etməyə çalışırlar. Revanşist qüvvələr vəziyyəti daha da gərginləşdirmək yollarını araşdırırlar. Paşinyanın özü isə Brüssel görüşündə iştirakda maraqlı görünür. Çünki Paşinyan Brüsseldə öz xeyrinə olan məsələlərə nail olmağa ümid edir. Ancaq onun ümidi boşunadır və hətta dediyimiz kimi, Ermənistan tərəfdən hər hansı təxribat olacaqsa, Brüssel görüşünün keçirilməsi belə sual altına düşə bilər”.

Politoloq qeyd etdi ki, Ermənistan əslində monoetnik dövlətdir və dünyada belə bir mənfi imici də yaranıb. Ermənistanda çox cüzi sayda yaşayan qeyri-müsəlman yezidi kürdlərdən başqa demək olar ki, milli azlıq yaşamır. Ermənistan monoetnik dövlət imicinin guya aradan qalxması məqsədilə həmin etnikin təmsilçisini parlamentə daxil edib. İndi də ermənilərlə həmin etnikin eyni mövqedə olduğu mənzərəsini yaratmaq məqsədilə Knyaz Həsənovu da erməni deputatlarla birlikdə Xankəndinə göndəriblər: “Şübhəsiz ki, həm Knyaz Həsənovun, həm də digər Ermənistan deputatlarının Azərbaycan ərazisinə daxil olmasının qarşısını Rusiya sülhməramlıları almalı idi. Sülhəramlıların bunu etməməsi Ermənistanın təxribatına faktiki ”yaşıl işıq” yandırmaqdır”.“Yeni Müsavat”

Loading...
image-ads_728x90

  • whatsapp
  • messenger
  • telegram
  • vkontakte
  • odnoklassniki